Sagaing region, Chaung U township KanMa khua, May 28 tuka Military council sipaiten an halnaah ruang 2, an hmuh thu tualchhung miten RFA Media an hrilh a.
May 27 khan KanMa khuaa Military council sipaiten an man tak mi 60-te hi an la chhuah rih loh thu tualchhung miten an sawi a.
May 28-a an thah te hi tute nge an nih hriat an la ni rih lova, chhui mek a nih thu Chaung U township PDF zinga thuneitu pakhat Ko Zar Ney Thein chuan RFA Media-ah heti hian a sawi a.
“KanMa khuaah Military council sipaite an la awm rih a, khawchhungah hian an hal hlum ruang 2 hmuh a ni a. Military council sipaite khawchhungah an la awm rih avangin PDF-te an la luh ngam rih lova, tualchhung mi an man te pawh khawiah nge an dah tih kan hre lo” tiin a sawi a ni.
Heng tualchhung mi an man 60 te hi Military council sipaiten khawchhung an luh chilh tuma tlanchhe ve thei lo te an nih thu hriat a ni a.
Khawchhung luh chilh Military council sipaite hi mi 100 rual vel an ni a, tualchhung mi te sawisak leh an thahna chungchangah Sagaing region, Military council thupuangtu, RFA Media-ten phone hmanga an zawhnaah chhanna a la awm rih lo a ni.
Chaung U khua atanga mel 10 vela hla KanMa khua leh Nat Te Kan khaw kiangah hian May 26 khan Military council sipaite, PDF tangrual pawlten an beih rawnnaah Military council sipai thi leh hliam an awm nual thu PDF pawlten an sawi a.
Political prison (AAPP)-ten kumin 2023 May 26 thlenga an thuchhuah danah chuan Military council sipaiten thuneihna an lak hnu hian tualchhung mi 18407 an man tawh thu an tar lang a ni.
