Chin State, Halkha leh Thantlang khaw inkar, Timit phaitual bula Military council sipaite leh CDF tangrual pawl te, chawlhkar khat chhung an inbeihnaah Military council sipai 20 vel an thi tawh a, 40 chuang an hliam tawh thu CNF/CNA thupuangtu Salai Thet Ni chuan a sawi a.
“July 3-8 chhunga kan inbeihnaah keini lam mi 6 kan hliam a, anni erawh mi 20 chuang an hliam thunga Damdawi inah mi 42 an inenkawl thu kan hria a, an deidawnga, an hnungtawlh niin kan hria a, Halkha lamah an pan leh a ni mai thei kan hre chiang lo” tiin Salai Thet Ni chuan a sawi.
Military council sipai 150 rual Battalion 5-ten May thla atang khan pawl 2-a inthenin Halkha leh Thantlang lamah an rawn bei tan a; Military council sipai thi leh hliam an awm nual avangin Halkha atangin an thian Military council sipaiten an rawn puih thu hriat a ni bawk.
He inbeihnaah hian CDF tangrualten silai 4 leh silaimu 1000 chuang an laksak a, Military council sipaite an hnungtawlh thu CNA thupuangtu chuan a sawi a.
Military council sipaite hian Thantlang khua thunun an tum leh avangin May thla chawhnu khan Halkha khawpui an pan a, Timit phaitual leh Long Kha tlang chhehvelah CDF sipaite nen an inbeih zawk thu hriat a ni a.
Fur ruah tui tlak chhung hian Military council sipaiten chung lam Thlawhna hmangin an beih ngei, Revolution pawlten an ring a, heng avang hian sa hlim nan; tawm buk, lei khur lai theuh turin CDF-ten thuchhuah an siam hial a ni.
