Myanmar spring revolution hi khawvelin hei aia an hriat leh zual theih nan “We are the world” tih hla hmangin Mizo zai mi insuihkhawm “Chhinlung Chhuak Artist” pawl te NUG sorkar acting President Duwa Lashi La chuan chawimawina a hlan a ni.
Tunlai khawvel chakna hmanga hun kal mek lai kum zabi 21-ah hian ram hrang hrang te ngaihven a harsat laiin Chhinlung Chhuak Artist pawl ten theih tawp chhuaha hla hmanga an au chhuah avangin Duwa Lashi La chuan chawimawina a hlan thu March 11 khan, a social media-ah a tarlang a ni.
“Kum 2 meuh Myanmar ram buaina chungchangah khawvel social media hrang hrangah tarlan a nih thu kan hre theuh ang. Military council-te kan hmachhawnnaah ram hrang hrang tanpuina kan mamawh hle a. Heng zingah hian Chhinlung Chhuak Artist te hma lakna kan hmu thei” tiin a tarlang a ni.
Chhinlung Chhak Artist ten Myanmar ram buai tan khawvel zai thiam lar hmingthang Michael Jeckson-a hla “We are the world” version thar hmangin February 2 khan Chin Tube, Youtube-ah khawvel hriatah an pho chhuak a. Thla khat chhung lekin entu mi maktaduai 1.7 chuang an tlin tawh thu hriat a ni.
Heng an hlasak hmang hian mipuite rilru a hneh mek a, harsatna karah Myanmar ram buaina atan tiin khawvel dawhsanah an pho chhuak a, mipui ten a ngaihlu hle tih kan hmu thei a ni tiin a sawi zui a ni.
Khawvela Youtuber ten la chhawngin Reaction Video a chhuak nual a, mak tih khawpin entu an tam hle a ni.
“Chhinlung Chhak Artist hla sak “We are the world” hla satu ten Myanmar spring revolution tan an inpekna chungchangah a lawmthu leh chawmawina a hlan thu” Duwa Lashi La chuan a social media-ah a tarlang a ni.
He an hla hmang hian khawvel mipui ten Myanmar ram buai chungchangah an ngaihven zual thu leh ram hrang hrang ten tanpui an pek pawh a ring a. Myanmar mi tan pawh a hlutna a sang zual a, he revolution hi bei chhunzawm zel turin a social media-ah a tarlang bawk a ni.
