Kumin February ni 20-a Chin National Day a vawi 47-na chu Chin National Front (CNF) headquarters Camp Victoria-a ropui leh hlawhtling taka hman a ni.
Victoria Camp-a hman Chin National Day-ah Chin National Front, Mipui venghimtu pawl CDF leh Alliance pawlte an tel a. A vawi 74-na Chin National Day nena inkungkaihin CNF Vice Chairman leh National Unity Government NUG hnuai Federal Affairs Minister Dr. Salai Lian Hmung Sakhong chuan heti hian a sawi.
“Vawiin hi Chin mite zawng zawng hnam ni a ni a, hnam chi peng pakhat chauh tana ni pawimawh a ni lo, Chin National Day a ni a, he ni hman a nihna chhan chu February ni 20 hi keini Chin miten Democracy system, Chin hnam ten politics system atana an lo thlan ni a nih vang a ni. Chuvangin, Chin National Day hlutna chu keini Chin miten democracy system, politics system-a hman kan lo tihthlukna hi a ni. Kumina kan hman Chin national day hi a hluin, a thuk a, kan vaiin he Revolution atan indona hmachhawn zel tuma intiamkamna a ni a, keini Chin National Front leh Chin mipui zawng zawngin Mipui revolution kal puiin, he Union hian Chin mipuite zalenna, intluktlanna a neihtir thlenga indona hmachhawnin, he Union hi Panglong-a Bogyoke Aung San leh Ethnic hnam hrang hrangte beiseina atang chiahin Federal Democracy Union i tung ding ang u, he khawvelah Chin mite an awm chhung chu democracy system hi hman a ni ang. Zalenna hi hlut thiam ila, mahni inawp theihna chanvo hi hman ni rawh se tiin a tawp nan ka sawi duh e.”
Chin National Day-a tel Yaw PDF pawl pawhin Chin National Day atana thuziak (message) hetiang hian an thawn a.
“History ropui tak nei Chin hnamte National Day hi zalenna, intluktlanna leh dikna ang chi democracy lantirtu a ni a. Tun hma atangin ram chhung thilah ethnic unau dangte nen a thlum a al ei duna an lo tel vena tarlanna history tam tak a awm a. Chu chu Chin miten ram leh hnam tana an pek khawingaihna dawhtheihna leh mi dangte hlutna te a ni a. Sipai thuneihna a zung chawpa phawi chhuah, Federal democracy tung ding a, ethnic mite intluk tlanna, mahni inawp theihna chanvo, ram chhung remna atan Chin mite telin, ethnic hnam zawng zawng nen inkutsuiha, inzahtawn bawkin i thawkho zel ang u tia chahin Chin National Day a vawi 74-na thuchah hi kan hlan e.”
All Burma Students’ Democratic Front (ABSDF) pawhin Chin National Front headquarters-a hman Chin National Day a vawi 74-na lawmpuina thuchah chu heti hian an thawn bawk a.
“Sipai thuneihna tihtawp nana kan huaihawt mek Spring Revolution-ah Chin mite Tukuli rilru put hmang chu a zahawmin a entawn tlak hle a. Spring Revolution a hlawhtlin thleng kut suiha indona hmachhawn zel turin he thuchah hi kan rawn thawn a ni e.”
Chin hnam ni pawimawh tak Chin National Day chu kum 1948 February ni 19 atanga ni 22 thlenga, Chin state Falam khuaa Chin National Conference hmasa berah Feudalism hnawl a, democracy inawpna thlanna ni denchhanna lo piang chhuak a ni a.
