Kum 2021 February ni atanga sipaiin thuneihna a lak hnuah sipai thuneihna pawm lo, thalai thenkhatin ralthuam ken thlangin military council sipaite an bei let a.
Chung thalaite zingah Chin hmeichhia nula Daisy pawh a tel a ni. Nula Daisy chu Magui University atangin Law degree la tawh a ni a, tunah chuan Chin National Front (CNF) headquarters Victoria sipai camp-a sipai lam nihna chelh mek niin, amah interview-na; zawhna chhanna hi lo ngaithla ta ila.
Zawhna: Hetianga ralthuam i ken chhan hi min hrilh thei em?
“He dictator system hi keiniin kan dodal loh chuan dodaltu an awm tah lovang. Chuvangin, thalaite chu tun hi an harhchhuah hun a ni tih ngaihdan neiin he Chin National Front-ah hian ka lut a, ralthuam ka keng a ni. Ralthuam kan ken hma chuan ralmuang takin kawng kan zawh a. Mahse military council lamin ralthuam an lek chhuak a, mipui chu dik lo takin an man a, thalai tam tak an tel. Chung zingah chuan ka thiante pawh an tel a ni. Chuvangin ralthuam tel lovin kan dodal thei lo a, keini lamah channa a tam tawh em avangin leh ralthuam an ken ang bawka ken ve a ngai tih ngaihdan neiin ralthuam keng ka ni.”
Zawhna: Ralthuam i lek hmaa I thil tumte leh i lo suangtuahnate min hrilh thei em?
“Kei chu Dan lam hre mi ka nih angin, Ukil tha tak nih ka chak a. Chuan Law school-a ka kal pawh hi, tum neia kal ka ni. Kan Chin state-ah hian zirna hi a la hniam hle a. Khawpui lamah kalin zir a ngai thin. Chungtianga zirnaah chuan harsatna tam tak a awm thin bawk a. Tawng leh thil danga inthliar hranna tam tak a awm a. Tin, Dan lam zir hi kan tlem hle bawk. Dan lam zira eizawn nana hmang hi kan tlem em avangin, kei chuan mahni khaw lama hman tangkai theihna tur ngaihtuahin chu school-ah chuan ka zir chhuak a ni.”
Zawhna: I hma lama hun atana i lo suangtuahnate leh tuna indinhmun en letin beidawn chang te i nei thin em? Beiseina i la nei tho em?
“A chang chuan beisei a bo thin a. Ka lo suangtuahna zawng zawng leh tuna ka dinhmun chu danglam tak a nih takah chuan, beisei a bovin a beidawn theih hle a. Mahse, beidawng thei kan ni lo. Thawh tur tam tak kan nei a. Harsatna, Thlipui a awm hnuah chauh boruak a dai nuam thin a, chuvangin tuna kan thlen chinah hei chu a tih theih a ni lo, a theih loh tia beidawng mai lovin, a theih dan kawng leh a tha zawk ngaihtuahna rilru nen hma lam kan pan phawt chuan engtik niah emaw chuan hlawhtlinna chuan min lo hmuak ang tih ka ring tlat a ni.”
