Chin State leh Myanmar ram chhung khawpui thenkhatah Military Council ten internet an kharsakna hi kum khat a tlin tawh thu hriat a ni.
Kum 2021 September 23 atang khan Falam township, Kanpalet township, Matupi township, Mindat township, Paletwa township, Tedim township, Thantlang township leh Tawnzawng township-ah internet an kharsak a.
Chin State hmun 5-a then, hmun 4-ah Military Council ten internet an off-sak avangin tualchhung mipui ten News chi hrang hrang en thei tawh lovin thim zingah an awm mek a.
Myanmar ram chhung township 25-a Military Council ten internet an kharsak zingah Chin State hi a nasa ber a. Chin State-a township 9-ah internet an kharsak deuhthaw thu hriat a ni.
Chin State-ah hian mi Nuai 5.2 vel awm nia rin a ni a, zaa 70 te hi Thingtlanga cheng te an ni a. Chhungkaw khatah mi pakhat hisap ang hi ram danga inhlawhfa an ni a. Internet thatna hmuna, ram danga an chhung ten an biak theih laiin an be ve thei tawh lova.
Chin State-a internet hman theihna awmchhun hi mi 51437 chengna Halkha State-ah chauh a ni a, khawpui chhungah mi 28823 an chen thu hriat a ni. Internet hman theih lai chuan mi Nuai khat velin internet an hmang nia hriat a ni a, a hnua hman theih loh a nih hnuah kawng hrang hrangah harsat an tawk nasa hle a.
Chin State hmun hrang hrangah Military Council sipai ten tharum thawhna leh Four Cut hmangin an la bei mek a. Chenna in tam tak an hal chhia a, pawi sawi lo mipui manin an that a, in leh lo tlansan a sing tel an awm tawh bawk a. Heng karah hian Military Council ten internet an kharsakna hi kum khat a tling tawh a, mupuite thim zingah an la khawsa mek a ni.
