MOCHA thlipui na zet chuan May 13,14 khan darkar khatah mel 50-70 laia chakin Rakhine tlangdung atangin Myanmar hmun hrang hrangah a nuai nasa hle a, Chin State-ah chenna in 3000 chuang an chhiat thu hriat a ni a.
Chhiatna thlen dan leh tanpuina kawngah hma an lak dan Khonumthung Media-in Chin National Counsultative Council (ICNCC) hruaitu zinga Salai Isaac Khen an interview-na i lo tar lang ang u.
Zawhna: MOCHA thlipui avanga Chin State-ah In 3000 chuang vel a chhia nia hriat a ni a, he chhiatna chungchangah In chung hawk leh a In puma len chhiat te a awm em?
Chhanna: A tam zawkah chuan In chung hawk leh bang len chhiat a tam ber a, a In puma len chhiah pawh an awm thova, awmnaa tlak lo, siam that leh theih a awm nual bawk a, tlangrama awm an nih avangin thuam that leh sak that ngai te a awm nual mai.
Zawhna: Chin State-ah eng township-ah nge chhiatna thlen tam ber ang le?
Chhanna: ICNCC-ten kan lak khawm dan chuan Matupi township hi a chhiat tamna ber a ni a. May 17 thlenga kan lak khawm dan chuan In 880 chuang a chhiat thu hriat a ni a. A dawtah chuan Mindat township a ni leh a, In 592 a chhia a, a 3-naah chuan Paletwa township a ni leh a, In 220 a chhia a. Chin hriat loh an la awm nual a; TanTaung tlak lam zar, Lay township lamah phei chuan Phone a hman theih loh avangin kan ngaichang mek a. Kanpalet township-ah In 110 chuang vel chhe turah kan ngai a. Falam leh Halkha township-ah hliam an awm thu hriat a ni bawk a, chhiatna tam ber hmun chu Matupi, Mindat, Paletwa leh Kanpalet township hi a ni deuh ber mai.
Zawhna: Tun dinhmunah hian MOCHA thlipui tleh avanga an chhiat tawhnaah eng nge an mamawh ber nia i hriat?
Chhanna: Tuna an mamawh ber nia kan hriat chu tui thianghlim a ni rih a. Eng vang nge tih chuan thlipui khan tlang kar leh a chhehvel kawr tui zawng zawng a tinui vek a, chawlhkar khat hnuah chuan a fim leh mai thei a. An Chhek in te a chhiat nual avangin ei tur leh silhfen an mamawh hle a. A bik takin Matupi township Zotung hmunah In 300 velin an tuar bawk a, Mindat township-ah pawh Chhek in a chhiat ve nual avangin ei in lamah an la harsa zel thei a, chu bakah hriselna lamah damdawi mamawhna a sang chho zel thei a ni.
In chung hawk leh bang a len chhiat nual avangin Fur hunah harsatna an la tawng zel thei a ni. Leimin leh kawng chhia a awm nual avangin Khaw khat khaw khat inkal pawhna a harsa a. Chawlhkar hnih khat hnuah kawng te a that chuan tui thianghlim leh an mamawh chi hrang hrang; In chung khuhna, chakkhai, damdawi thlengin chhawmdawl an tul ngei ang.
- Interview hi lehpekah kan chhunzawm leh dawn a nia.
