MOCHA thlipui avangin Chin State-ah chenna in 1700 chuang a chhiat thu hun khaihlak chhunga Chin National Consultative Council (ICNCC)-ten May 17 khan an thuchhuahah an tar lang a.
MOCHA thlipui chak tak hian May 14 atang khan Rakhine tlangdung Sittwe (Sit Tue) khawpui bulah pal tlangin Chin State-ah darkar khatah mel 50-70-a chakin a tleh thu hriat a ni a.
MOCHA thlipui tleh avangin Chin State township 9 zinga Matupi, Paletwa leh Mindat township-ah chhiatna a nasa zual a, Chin State pum puiah chenna in 1774 a chhiat thu ICNCC-ten an sawi a.
ICNCC-ten an chhinchhiah dan chuan Matupi township-ah In 887, Mindat township-ah in 364, Paletwa township-ah in 220, Kanpalet township-ah in 112, Halkha township-ah 85, Falam township-ah in 74, Thantlang township-ah in 27, Tedim township-ah in 5 a chhia a, Tawnzang township-ah in chhiat a awm loh thu hriat a ni bawk.
A chhiatna hmunah hian Matupi township-ah sakhaw (Biak in) in 7, Clinic 4, school 1; Mindat township-ah sakhaw in 7, school room 18, chhek in 17; Kanpalet township-ah sakhaw in 3 leh school 5, chhek in 2, Falam township-ah sakhaw in 9, school 5 leh Halkha township-ah sakhaw in 1 a chhiat thu hriat a ni bawk.
MOCHA thlipui tleh avangin township hmun hrang hrangah chenna in tam tak a chhe nual a, awm hulna sakna turin rangva, perek, silpaulin leh pawimawh dang an mamawh hle a. An rinrawl ber Chhek in an len chhiat vek tak avangin ei in leh damdawi tanpui an mamawh hle thu ICNCC-ten an thuchhuahah an tar lang a ni.
Tun dinhmunah hian Chin State-ah internet leh phone signal a la hman theih loh avangin MOCHA thlipui tleh avanga chhiat tawk te kimchang a la hriat theih loh thu ICNCC-ten an sawi bawk a ni.
