Chin State-a health department Lailun Clinic-a thuneituten an enkawl danin mipui 30% te chu sikserh natna an vei thu ICA te hnen atanga hriat a ni a.
Clinic-a pantute zinga mi 500-ten Tui-Lun-Tok-Kui (Dengue) an vei a, 30% ten sikserh natna an vei thu hriat a ni a, 20% te chuan hritlang awm na an vei thu ICA Asst. Director Salai Van Sui San chuan heti hian a sawi.
“Tunah chuan Dengue natna a hluar ber a, tun hmaa awm ngai lo sikserh natna pawh a pung chho zel a. A chhan chu inenkawlna damdawi a awm loh bakah inven lawkna damdawi a awm loh vang a ni” tiin a sawi a.
Heng natna te hi khawpui pawn lamah a hluar zual nia hriat a ni a. Kumin May 12 atang khan Chin State hmun zalen pakhatah Lailun Clinic, khum 20 awmna hawn a ni a, a hawn atanga July thla, thla 2 chhung khan damlo mi 500 chuang an enkawl tawh a ni.
Lailun Clinic hian thingtlang khaw 50 vel a enkawl thin tlangpui a. “Kan mamawh ber chu inenkawl lawkna damdawi hi a ni ber a, damdawi tanpuitu kan mamawh a, sikserk natna leh Dengue natna inven lawkna tur damdawi tanpui theih tur kan mamawh hle a ni” tiin Salai Van Sui San chuan a sawi a ni.
Clinic-ah hian regular-a thawk Doctor 1, nurse 2 leh staff 8-ten an vil reng a, damlo an tam thin avangin an indaih loh hle a, hnathawktu leh building an indaih loh avangin theih tawp chhuah a ngaih thu hriat a ni bawk.
Heng bakah hian Thingtlang khaw hrang hrangah Mobile Clinic hmun 2 hawn belh a ni bawk a, Military council-ten thuneihna an lak, kum 2 hnu hian damlo mi 7000 chuang an enkawl tawh thu ICA-ten an thuchhuahah an tar lang a ni.
India, Mizoram State, Champhai District, Zokhawthar khuaah pawh Clinic leh Mobile Clinic hawngin raltlan mi 5000 vel enkawl tawh niin Aizawl khawpuiah pawh raltlan mi 300 chuang enkawl tawh an nih thu hriat a ni bawk.
Heng damlo enkawltute hi CDM-a lut Doctor te leh nurse te bakah tlawmngai pawlten harsa tak chungin an enkawl mek thu hriat a ni a, an indaih lohnaah tanpui an ngaih hle thu hriat a ni bawk.
