Chin state chhungah sipai inlakhawm zelin Chin ralthuam keng pawl leh Chinland mipui venghimtu pawlte chu nuai chimih tum angin an lang a. Chu mi chungchangah Chin National Front (CNF) thupuangtu Pu Thetni zawhna leh chhanna hi han tarlang ila.
Zawhna: Tunah hian military council lamin sipai an inchheckkhawm zel a, Chin state lam luh chhuah an tum hmel a, tank 2 pawh a tel bawk a. Chutianga force tam takin an intelkhawm danah hian operation lian tak neih tumin an inruahman a nih hmel a, CHRO lam pawhin CNF an bei thei niin an Twitter-ah an tarlang bawk a. Tunah pawh inkahna chu a thleng reng tawh a. Chu lai boruak vel chu min hrilhfiah thei ang em?
Chhanna: Keini pawhin military council chet dante chu CNF ang pawhin kan enthla reng a. Thuneihna lak a nih hnuah tun tuma force an intelkhawm dan hi tun hma nen a inang lo a. Anni chuan tank nen Chin state hmar lamah ram lak tumin an rawn tawlh chho tih a hmuh theih a. Sipai an rawn dah belh a, ration pawh an rawn supply belh zel a. A chhan bera lang chu CNF camp hi rawn beih an tum niin kan hmu a. Chu bakah Northwest command headquarters hotu lut ber thlak a nih takah chuan kumin chhunga thil thleng chu a danglam ta bik a, kan Chin state hi Sagaing region policy tiin chi hrang hrangin hma an rawn la thei dawn niin kan thlir lawk a ni.
Zawhna: Nakin lama inkahna chhuak leh tur dinhmunah engtin nge I thlir dan?
Chhanna: Hetiang reng a, ration, motor, sipai motor bikte a rawn tam chhoh zela ralthuam lian leh rip tak nena an rawn kal takah chuan inkahna chu nasa lehzualin a chhuak dawn tih hi ka sawi duh chu a ni.
Zawhna: Tunah military council lamin inkahhai a puan hnuah Kachin, Kayin leh Chin lamah sipai force dah belhin, a bikin NCA-a hming signed pawl thenkhat nen inhmachhawna beih zui mai a tum hmel bawk a ni. Chu mi chungchangah enge sawi belh duh i neih?
Chhanna: Anni inkahhaina kalpui dan han en hian kei lamah inkahna a thleng reng a. Secuirty that lohna hmun tih loh, hmun dangah inkahhai an puang a. Awmzia a nei lo a. Hmun ralmuangah inkahhai a ngai lo, a ralmuang sa tawh a. Chuvangin, inkahhai tih chu keini tan awmze nei lo niin kan hria a. A chhan chu anni lamin tualchhung a ralmuan nan tiin an ti a. Keini inkahna chhan pawh tualchhung a ralmuan nan tho a ni a. A inpersan hle a. Inkahhai an kalpui dan chu keini tan awmze nei lo a ni tih ka sawi duh a ni.
Zawhna: Hetianga sipai lamin CNF hi direct-a a rawn beih takah chuan NCA chungah nakin zelah nghawng a nei thei ang em?
Chhanna: Keini lamah chuan NCA nena inkungkaihin NCA inremna thuthlung chu bawhchhetu chu military council a ni a. NCA tih hian awmzia a nei tawh lo. A chhan chu NCA kaltlanga political dialogue nei tur chuan sorkar, parliament, military leh keini ethnic armed group te kalkhawm a ngai a. Tunah chuan sorkar a awm tawh lova, parliament a awm tawh bawk lo a, NCA chu engtiang a, politics zawnga han kapui tum nge an nih. An bawhchhiat avangin, NCA chu awmze nei tawh lo a ni a. Kalpui theih a ni tawh lo.
Mahse, NCA thuthlunga hming ziah tawh kan sut leh tihna a ni lo. NCA awmze dik tak chu enge ni? Ram chhung a ralmuan a, Federal democracy tun din tur tih hi a tha hle a, mahse a tak ramah NCA hi awmze nei lo a ni. Anni ho hian thuneihna lain, an hawikir lo a nih chuan inrintawnna neia kan ram politics phutte nen National reconciliation neih chu a har viau ang. Chuvangin, tunah chuan NCA hi a taka chantir theih a ni lo a, engmah lo mai a ni tih ka sawi duh bawk e.
Zawhna: Tun hnaia thil thleng chungchangah sawi belh duh i nei em? Mipui lam pawh CNF hmingin chah duhte i nei em?
Chhanna: Kan hriat tur pawimawh ber chu tunah chuan inbiakna leh inkahhai tih te hi awmzia a nei tawh lo a. Chung zawng zawnga mawhphurtu ber chu military council a ni. Tunlai ram chhungah inkahna chu a ni telin a punlun chho zel a, ram chhung inawpna leh inrelbawlna zawng zawng pawh a tluchhe titih tawh a. Chu mi atana mawhphurtu ber chu military council tho a ni.
Keini ethnic armed group te PDF, CNF ralthuam keng pawlte tum ram lamah kan vaia inlungrualin, indona hmachhawn tura inpuahchahin, inkahna a chhuak a nih chuan thi leh hliam chu an awm ngei dawn a. Chu mi atan keini ethnic ralthuam keng pawl chuan ram chhunga mipui pawi khawih lo thei ang ber tura hmalak kan tum reng a ni. Chutianga mipui khawih pawi zawnga thil a thleng palh a nih chuan raltlan an tam phah thei a. Chung hunah pawh Chin mipuite telin mihringpuite inchawmdawlna chu ram hrang hrang, ram chhung leh pawna awmten tanpuina pe zel turin kan ngen duh a ni.
