July 11, zing dar 11 vel atang khan Chin State, Falam kawngpuia awm Taal khua chu Military Council ten chenna in an hal zo tep thu Taal khua tualchhung mi pakhat chuan a sawi.
Taal khua tualchhung mi pakhat chuan “Nizan khan kan khaw bulah buk an khuar a, tukin zing dar 8 vel atang khan a khawpum deuhthaw an hal a, in 7 chauh a bang tawh a. Kan hlauh avangin ram hnuaiah kan biru a, ral lehlam atangin kan thlir reng a ni” tiin a sawi.
Taal khua hi Falam khawpui atangin mel 14 vela hla a ni a, sorkar hnathawk tiamin in 41 an awm thu hriat a ni. Khawchhung mipui te, ram hnuaiah an tlan chhiat vek thu hriat a ni.
Heng bakah hian Military Council ten Falam township, Lungrang khuaa chenna in an rawk nasa hle a, bungrua an laksak nual thu hriat a ni a.
June 29 atang khan Military Council ten Motor 27-in, Kalaymyo atanga thawk chhuakin Halkha khawpui an pan a, Falam leh Halkha khawpui inkarah an awm thu hriat a ni.
July 8 khan Tlangrawn khaw bulah Military Council te leh CNA, PDF tangrual te, tum 3 zet an inkap a, Military Council lam an thih nual thu hriat a ni leh a. Nikum October thla vel khan Military Council ten Taal khuaah chenna in 11 zet an hal chhe tawh bawk a ni.
