Chin State, Halkha township-a khaw hrang hrang Zaa 90 chuang hi kan thunun tawh tiin Chinland Defence Force, CDF-Hakha Council-te chuan September 17 khan thuchhuah a siam a.
Myanmar-a Military Council ten sorkarna an lak hnu hian Military Council sipaite leh CDF-Hakha Battalion-te, tum 103 an inkap tawh a. Military Council sipai 419 thi tawhin mi 190 chuang an hliam tawh thu leh Halkha township-a khaw hrang hrang Zaa 90 chuang hi kan thunun tawh niin September ni 17-ah CDF-Hakha Council ten an thuchhuahah an tarlang bawk a.
CDF-Hakha te hi Chin State, khawpui hrang hrangah Operation thawk tam ber te zinga mi an ni a. Military Council ten sorkarna an lak hnu hian tum 50 chuang an thawlk chhuak tawh.
Revolution a kal vung zel theih nan Hakha twonship chhunga Revolution force-te zinga palai 300 vel inhmuhkhawmna Conference pakhat chu September ni 19 khan buatsaih a nih thu CDF-Hakha Council chuan a tarlang bawk a.
Chu Conference thutlukna angin Chin hnam leh Chin state chunga dik lo taka inawpbehna leh hna lian zawk inchaldelhna lak atanga zalen theihna turin Chin National Front (CNF/CNA) nen thawhho zel a nih tur thu hriat a ni a.
Sipaiin thuneihna an lak hnu, Hakha township-a military council pawlin dan lova an man chu mi 337 an awm tawh a, chung zinga mi 309 chu chhuah zalen tawh niin, a bang mi 28 chu dan lova hren reng a la nih thu CDF-Hakha Council chuan an sawi bawk a.
Chu bakah, military council kut thlakna avangin civil mi 6 an thi a, chenna in 27 hal chhiat a nih bakah, laipui pawng tawng kah avangin, chenna in 3 a chhiat thu hriat a ni.
