Chin State, Paletwa township-ah August 1 atang khan Military Council ten khawmual lam leh tuipui lama kal thin te an khar avangin bungrua an chatlak a. Buhfai leh eichawp thil bakah tuialhthei man a sang chak hle a, lei mai tur a awm loh thu Paletwa tualchhung mi pakhat chuan a sawi.
Paletwa township-ah hian August thla chhung khan Military Council-te leh AA-te an inkah nasat avangin Military Council ten Kyauktaw (Chauh Taw) leh Paletwa tuipui kawng an khar avangin Buhfai leh bungraw thenkhat an khaihlak a.
Paletwa khawpuia tualchhung mi pakhat chuan “Kan awmna Kyauk Taw khawpui hi bungraw thawn lutna hmunpui ber pakhat a ni a. Hetia tuipui kawng an kharna hi chawlhkar 2 a ni tawh. Buhfai leh eichawp thil bakah tuialhthei man a sang nasa hle a, kan lei thei tawh lo” tiin a sawi.
Tun hma chuan Buhfai ip khat man hi K.65000 a nih laiin K.90000 thleng a kai chho va, Dawr dangah phei chuan lei tur a awm lo. Petrol pawh Galon 1-ah K.26000-a lei mai tur a awm loh thu tualchhung mi pakhat hnen atanga hriat a ni.
Chin State, Paletwa township leh Rakhine (Ra Khaing) State, Maungdaw (Mawng Daw) township-ah tun August thla chhung khan Military Council leh AA te inkarah inkahna a thlen thu, August 11 khan AA te press conference-a thu puangtu Khain Tuhka (Khaing Tuh Khah) chuan a sawi.
Paletwa, Kyaukdaw tuipui kawng khar a nih avangin Military Council te tiamin township dang te pawh haw thei lovin Kyaukdaw-ah an tangkhang nual thu hriat a ni.
Sittwe (Sit Tui) khawpui Clinic-a, damlo in entir pakhat chuan “ Sittwe-a Clinic-ah kan in entir a, ka haw lam chu Tuipui kawng an khar a, Kyaukdaw-ah ka tang reng a, chawlhkar 2 a ni tawh. Mi dang pawh haw thei lovin an awm nual mai” tiin a sawi.
Military Council ten sorkarna an lak hnu thla vel atang khan Paletwa-Matupi Motor kawng an khar a. Kyaukdaw-Paletwa tuipui kawng an khar avangin bungraw thliar luh a awm tawh lova, tualchhung mipuite hriselna leh khawsakphung an harsat thu tualchhung mi ten an sawi.
Paletwa township-ah hian August 2 khan Military Council ten an kah avangin zirlai mi 2 an thi a, zirlai naupang mi 1 tiamin mi 3 an hliam.
Tun dinhmuna Paletwa township-ah hian Military Council-te leh AA te inkarah boruak a sang chho hle bawk.
