Chin State-a CDM police te din, Chin State People’s Police te, in hmalak dan kan lo hria a. Chin State People’s Police hi kum 2022 October 9 atang khan hmun him lama awm CDM police te nena pawl din kha a ni a. Chin State People’s Police-te dinhmun, an thubuai buaipui mek leh an hmalak dan chungchang te Chin State People’s Police chairman Steven-a Khonumthung Media-in a biangbiakna i lo tar lang ang u.
Zawhna: Chin State People’s Police pawl hi eng ruahmannaa din nge in nih le?
Chhanna: Kan din danah chuan he lam Chin huam chhungah hian CDM 900 vel kan awm a, Heng 900 zingah mi 500 te chuan eng tin nge hma lak zel ang tiin sawihona kan nei a. Kan sawihona angin October 9, 2022 khan Chin State People’s Police Committee tiin kan din phawt a, a hnuah Chin State People’s Police tiin kan thlak leh ta a ni.
Eng vanga din nge kan tih chuan he revolution hi nakinah chuan za-a zain kan hneh ngei dawn a. Chuvang chuan he revolution chhungah hian dan leh hrai leh lungrual taka kalphung thar hman thiam a tul a. Tun hma dan leh hrai te kha, thenkhat tan tha hle mah se, mi dang tan a rem tawh loh avangin dan hlui hnawlin dan thar kan siam hi a tul tawh a ni.
He pawl hi awlsam tak leh phuahchawpa din satliah mai a ni lova, a nem zawng leh thiamna hmanga din, kalphung awmze nei tak pawl a ni a. Chuvangin revolution tan chauh pawh ni lovin, revolution hnu thleng pawha kan that tlanna tura ruahmanna a nih avanga he pawl hi din a ni.
Zawhna: Chin State People’s Police te hian eng angin nge hmalak in tum?
Chhanna: Kan tum bera chu Chin State-ah dan leh hrai kenkawhna kawngah hmalak hi a ni ber a. Eng vang nge tih chuan kan ram dinhmun kan en hian dan leh hrai kenkawhna kawngah hmalak eng mah hmuh tur a awm lova, a tlusawp tawh a. Chuvangin, he revolution chhung leh a hnu leh zel atan tiin kawnghmang dik taka a kal theih nan hmalak kan tum a ni.
Zawhna: Eng ang kalhmangin nge hmalak in tum le?
Chhanna: Tunah hian township hrang hrangah police outpost a awm thluah a, a chhuitu pawlten hma an la zel a, tunah hian thubuai 200 vel nei mek a ni a. A tul angin an awmna township police outpost thawn zel a ni a. Heng thubuai neite hi chin fel theih nghal a awm rualin ngaihchan thil pawh a awm thei a, kan chhinchhiah thlap zel a ni. A theih chin chinah thubuai awmna township-ah chin fel zel tum a ni a, a theih loh chuan a tulin hmun dangah pawh bawh zui nghal a ni ang. Heng hi hmalak vek a nih theih nan hmun tinah kan duty zel a ni.
