Zawhna: Tuna in thubuai neihah hian eng thubuai nge tam ber a?
Chhanna: Military council atanga chet velna leh mahni leh mahni intihthiam lohna a tam hle a, rukruk vang leh pawngsual bakah ruihtheihthil vang hi a tam ber a. Heng bakah hian Zu (BE) vang te, thing kih ruk, ramri pela chet vang te, pawngsual leh thil dang pawh a tam mai. Heng zawng zawng hi a tul anga hmalak mek niin an phu tawka hrem turin kan bawh zui mek a ni.
Pakhat lehah chuan in hmun, lo ram inluahsak chungchang hi a ni a. A chhan chu Military council-ten thuneihna an lak hmaa an awmna In leh lo ram te chu, Military council-ten thuneihna an lak hnu hian hlauhna avangin ramhnuaiah leh hmun dangah an tlanchhiatsan nual a. A thlanchhiatsan chenna in ruak te chu mi dangin an in angin an luah a, hmun leh lo ram te pawh an ta angin an pal hung hlauh thung a. Heng thubuai neuh neuh hi sawi tur a tam mai a, a la awm zel mai thei bawk. Chung thubuai neuh neuh te chu a tha thei ang berin bawh zuia chin fel kan tum bawk a ni.
Zawhna: Tuna in awmnaah hian eng ang harsatna nge in tawh mek le?
Chhanna: Kan harsatna ber pakhat chu khawpui chhungah hian Military council sipaiten buk an la khuar tlat mai hi a ni a. Khaw dangah erawh chuan Chin State Peoples Police te, CDF, CNA, CNDF leh PDF te nen tangkawpin kan awm thluah mai a, harsatna a awm vak lo. Kan harsat lehna chu sum leh paiah a ni leh a; mahse, kan beng ka chhu chhet lui a. Tunah hian Chin State People’s Police-ten tanpuina chungchangah kawng hrang hrangin hma an la mek a. Harsatna chi hrang hrang awm thin mah se, chawl lovin he revolution hi theihtawpin kan bei zel dawn a ni.
