Sagaing Region, Kalaymyo-a Chin tlawmngai pawlte tana, mi tlawmngai pakhatina a pek Car pakhat chu Swebo (Sui Bu) khawpui check Gate-ah Military Council sipai ten an mansak a, October 6, thleng an la pek rih loh thu hriat a ni.
Tlawmngai mi pakhatin Yangon khawpuia Toyota Alphard Car a lei chu, a haw lamah September 1 khan Sagaing Region, Swebo khawpui check Gate-ah Military Council sipai ten an mansak thu Chin tlawmngai pawl zinga mi pakhat hnen atanga hriat a ni.
“Military Council sipai ten an check-naah Driver chu Chin mi i mi em tiin an zawt kual vel a. Driver chuan Burma ka ni a ti a. Chin mi i nih chuan he hmunah kan kap hlum ang che. Chin mi reng reng hi hmelma vek in ni a, eng vang nge Chin Motor i khalh a? rammu te nen i inkungkaih em tiin an zawt kual vel a. Monywa (Mong Zua) khawpui mi i nih angin Monywa-ah kir vat rawh tiin a Car chu an chhuhsak a, Driver chu Monywa lamah a kir ta niin kan hria” tiin Chin tlawmngai pawl zinga mi pakhat chuan a sawi.
He Car hi Road Trasport Administration Department te phalnaa lak chhuah a ni a, Military Council sipai ten an mansak ta a ni.
An Car man hnu, ni 6 hnu thleng hian Office hrang hrangah an hriattir a, Swebo khawpui thleng pawha lak let leh an tum pawhin vawiin thleng, an la lak theih loh thu hriat a ni.
Chin tlawmngai pawl zinga pakhat chuan “ Keini chuan eng hnam mah thliar lovin kan tanpui zel a. Eng sorkar pawhin thuneihna la mah se, kan hre thiam vek a, kum rei tak thawh kan tum. Tanpuina sum kan dawng tam lova kan theih ang tawkin tan kan la zel. Min tanpuitute an hmaizahawm khawp mai, eng mah sawi theih kan nei si lo” tiin a sawi.
Swebo Gate-a Car mantu hi Police bawk 3, Si Tu nia hriat a ni bawk.
