China foreign Minister Mr. Qin Gang leh Military council leader Sr. General Min Aung Hlaing te May 2 chawhnu khan Naypyitaw khawpui Military council President Office-ah an inhmuh thu Military council news chuan May 2 chawhnu khan a tar lang a.
Tun tuma ram 2 inpawh tawnna chungchangah hian China hian a lantir a, khawvel hriatah Myanmar lama a din reng thu China foreign Minister-in a sawi tiin Military council news chuan an tar lang a ni.
China foreign Minister Mr. Qin Gang hian Myanmar-a a zinnaah May 2-4 thleng a cham dawn thu hriat a ni a.
Military council leader nen an inhmuh hmasak ber niah hian ramri chungchangah remna leh muanna a awm theih nan leh hma a sawn theih nan te, ram chhung leh pawna inpawh tawnna leh hma a sawn theih nen te an sawi dun thu Military council news chuan a tar lang a.
Hemi hnu chawhnu lamah hian Military council foreign Minister U Than Swe nen an sawi dun leh a. Ram 2 indawr tawnnaah hma lakna tur project thar te, Myanmar leh China insumdawn tawnna hma lakna thar leh kawngpui tha siama nasa zawka hma lak thuai a nih theih nan te an sawi dun thu hriat a ni bawk.
Heng bakah hian Myanmar leh China te inhnaih zawka inpawhna thuk leh chak zawka hma lakna tur te, ASEAN, Shanghai insuihkhawm pawl leh UN bakah khawvel ram hrang hrang te nen thawhho dan tur te an sawiho thu Military council foreign Ministry ten an thuchhuahah an tar lang bawk a ni.
Mr. Qin Gang hian May 2 khan China leh Myanmar ramri te tlawh kualin China leh Myanmar ramri-ah muanna leh invenna uluka a awm theih nan te leh Myanmar ten hnathawhna tha zawk a neih theih nana kawng thar hawn belh a tul thu a sawi chu Xinhua news chuan a tar lang bawk a ni.
China council member ni bawk China foreign Minister Mr. Qin Gang hi May 1, khan Beijing khawpuiah UN envoy Noelee Heyzer nen Myanmar chungchang an sawi dun hnu, ni khat hnuah Myanmar-ah a zin nghal thu hriat a ni a.
Mr. Qin Gang, Myanmar a zin tum hian Military council leader lo ni tawh Sr. General Than Swe nen an inhmu dawn tiin chanchinbu thenkhatah an tar lang bawk a ni.
