Chin State chhim lam, Kanpalet township CinDui khua atanga Magway region, Laung Shi khaw lama pan mekMilitary council sipaite chuan LaungShi khaw kawnga khawchhung bungrua man to tak tak an laksak nual thu CDF-Kanpalet, Khuanu battalion-ten an thuchhuahah an tar lang a.
Military council sipai 50 rualten CinDui khua kawng kam, khaw 6-a chenna in an rawk nasa hle a, inchhung bungrua leh Biak in bungrua bakah zirna school-a bungrua an laksak nual thu August 7 khan an thuchhuahah an tar lang a ni.
Heng bakah hian khawchhunga ran leh arva eng zat nge an ei zawh tak tih hi tualchhung mi te an raltlan vek avangin an zat an hriat theih loh thu Khuanu battalion-a thuneitu pakhat chuan a sawi bawk.
Military council sipaite hian kawng kama electric ban te tichhiain Battery box, Solar plat, thingrem leh Bizu (Woodrop) leh thingphel tam tak an laksak nual a ni.
CinDui khuaa ration pe tur Military council sipai 300 telna sipai motor 27 te chu July 31 khan Masatui khuaa an riah tumin chenna in pakhat hmangin an sipai ruang te an hal thu Khuanu battalion-ten an thuchhuahah an tar lang a ni.
Heng Military council sipaite hi August 2 khan Masatui khua atanga LaungShi township, Sue Lue Cin khuaah kir lehin August 3, chawhnu khan, LaungShi khuaah an luh thu Khuanu battalion-a thuneitu pakhat chuan a sawi a ni.
