By Development Media Group (DMG) Article
Ko U Maung leh a nupui Daw Aye Aye Thein te chuan fa 3, kum 7 mi Maung Wi Yan Lin, kum 4 mi Maung Ko Ko Lin, kum 2 mi Maung Kyaw San Win te neiin Rakhine State Kyauh Taw township, Swe Pyi khawteah an khawsa ve naw naw a. Nakinah eng boruak nge an tawn dawn tih erawh an hre lawk hauh lo le.
Ni tin ei chawp zawng an nih avangin an nupa chuan an khua atanga mel 2 vela hla, tlang chheng chhe karah an feh thin a. An feh chhuah hma zing dar 7:00-ah hian an fate ei in tur an siamsak hman vek a, chumi hnuah kein an ram chhuak ni tin thin a ni.
Hetia an ram chhuah hma hian pa ber Ko U Maung hian a fa upa ber kum 7 mi, Maung Wi Yan Lin-a chu a naute kilkawi turin thu a chhah ziah thin a. An feh chhuahsan thin hian naupang 3 chauh nia kalsan chu an ngaihtuah hle thin a. Ni khat thawh, ni khat ei thei ngawr ngawr an nih avangin an thawh loh chuan mei alh en an ni mai dawn si a.
“Hnathawh laite chuan eng emaw a thleng palh ang tiin kan fate chu kan rilruah an awm reng thin a, hma taka haw turin tang kan la ve fat fat nupa thin a. Tlaia kan haw chan te hian kan fa ten nghakhlel takin min lo thlir reng thin, thlahlel em ema fate hmel han hmuh hi chuan ni lenga kan chauh pawh kan hre tawh lo a ni ber mai,” tiin Pa ber chuan a sawi a.
Kan thlai hnah leh thil dang hawn te chu kan tel zawh hnuah khawchhungah vahpuiin kan zuar thin a, ni khatah Ks.5000/ 6000 vel kan hmu ve thei a, chu chu kan chhungkua inchawmna a ni ber mai. Hetia chhungkaw hlim taka kan awm lai hian inkahna lo awm tawhin kan chungah nghawng lian tak mai a rawn nei ta a ni.
April ni 4, tlai lama, pa ber Ko U Maung-a thlai hnah tel lai chuan nu ber Daw Aye Ayr Thein chuan inhnuaiah a naupang ber hnute a hnektir a, a bul lawka a falai leh upa ber te infiam paha an nuih ker ker lai chuan ring mangkhengin thil a puak dur mai! Pa ber Ko U Maung-a’n a han hmuh chuan rapthlak a ti kher mai!
A fa upa ber chu tlan chhuakin ‘Ka pa, ka pa tichulin a tap ta vak vak’ mai a. Nu ber chuan ‘Paa, eng tin nge kan tih dawn, ke 2 ka nei ta lo’ a ti a. A fa lai pawh chuan ‘Ka pa, ke ka nei ta lo’ tiin lungchhe vankaiin an tap hawm hawm a. A naupang ber phei chu a thi zui nghal a.
Pa ber Ko U Maung-a’n ‘Tu ber nge ka bawihsawm dawn tih ka hre tawh lo, ka hamhaih vek tawh a, ka riru a chiai zo vek! Ka A dawn ni te hian ka inhria’ a ti a.
He thil puak nasat avang hian nu ber Daw Aye Ate Thein ke ding lam a tliak a, a ke vei lam a khaw lo bawk, a awm ding lamah Zen a lut bawk. A fa upa ber Maung Wi Yan Lin chu a ke vei lam leh a hnungzang a hliam nual thung a. A fa lai Maung Ko Ko Lin pawh a ke 2 a hek nuai a, a vei lam phei chu a tliak lehnghal. A naupang ber Kyaw san Win-a chu a awmah Zen-in a fuh avangin an hmunah a boral nghal a ni.
Ko U Maung chuan a nupui leh a fate chu Swe Pyi khua atangin Kyauh Taw Damdawi in a panpui laiin Ti Rih Chaung khua an thlenin a nupui Daw Aye Aye Thein chuan a peih lohsan a. Chumi hnu lawkah Ti Rih Chaung khaw pelhah a fapa lai ta Maung Ko Ko, a boral ve leh bawk a!
Kyauh Taw Damdawi in a thlen meuh chuan a fa upa ber Maung Wi Yan Lin-a chauh enkawl theih a ni ta a. Mahse, a natna a zual em avangin April ni 7, khan Kyauh taw Damdawi in atangin Sittwe Damdawi inah enkawl leh a ni.
Ko U Maung hian hun rei lo te chhung hian a nupui leh a fa 2, a sun hman a, a rilru mangan turzia chu hriat thiam a har ngawt ang. Chu ai maha a la tawrh thiam loh pakhat chu a nupui boral ta Daw Aye Aye Thein khan thla 4 mi, nau pai a thihpui kha a ni. He mite chhungkuain chhiat an tawhna chhan ber chu, Rakhine-a kum 2 chhung vel inkahna a thlen tawh hnua Maipawl ruak vang a ni. A nu leh pa te an awm loh chhung khan a fa lai leh upa ber ten an kawt, kawr kam a mi Maipawl ruak an lak chu a nu leh pa haw hnuah infiam paha an chhut keh avanga puak ta kha a ni.
An tum dan chuan, tun Ber thla vel hian an fapa upa ber Maung Wi Yan Lin hi Sin-Piuh (sakhaw lama inhlan) tura ruahman a ni a, tunah chuan beisei bo a ni ta. Ko U Maung te chhungkua hi 2020, March-a Myanmar sipai leh Rakhine Army (AAA) te inkahna avanga mipui an raltlan chiam tum khan tlan vein Kyauh Taw township, Ngaung Chaung, Camp leh Maha Myait Mu Ni, refugee Camp-ah an awm a.
Inkahna a reh hnu 2020 kum tawp lamah khan tuna an awmna Swe Pyi khawteah an chhungkuain an khawsa leh ta a ni. Heng hunlai hian chhungkhaw hlim tak an ni thin a, Pagoda-ah te kal hovin an chhungkaw tan leh an fate tan malsawmna dilin an pathian chibai an buk thin a.
Heng hunlai vel hi Ko U Maung-a tan chuan kohkir leh theih tawh loh thil chhinchhiah tlak a ni ta reng mai. Ko U Maung-a duh dan chuan ‘Kan boruak tawn dan hi nakin hunah pawh thleng tawh lo hram se, bomb puak thei reng reng hi thian fai thei vek se’ tih a duh a. Kum 70 chuang meuh Myanmar ramah hian Civil War-in a nghawng Ko U Maung-a te chhungkaw chunga thil thleng hi ngaihtuah thiam har tak a ni.
Rakhine-ah hian kum 2 chhung inkahna avangin raltlan mi 200000 an tling titih tawh a. Boruak a reh deuh avanga khawchhung pan leh an awm nual nain, mi Nuai 1 chuang ram pilril-ah an la tangkhang mek a ni. Inkah hun laia ralthuam leh rah puah bomb la chambang puak avangin mipui lam mi 60 vel thi tawhin mi 100 chuang hliam an awm tawh thu Rakhine mipui insuihkhawm pawl chuan an tar lang.
Myanmar ram chhungah ralthuam puak thei (UXO) avanga thi, hmun 3-a then hmun 1 chuang hi naupang te an nih thu Myanmar UNICEF chuan April ni 6 khan a tar lang. Heng naupang thi tam zawk te hi Rakhine State-a mi te an ni a, ram puma chawhrualin 47% an nih thu hriat a ni.
Ko U Maung-a chuan a fa upa ber damlo Maung Wi Yan Lin-a kut fawp pah chung chuan ‘ He ka fapa hi mihring pangngaia a chan leh theih nan theih tawp kan chhuah tang tang ang, chu chu ka ngaihtuahna awmchhun a ni ta’ a ti a.
Tualchhung indona avanga a nghawng, hliampui tuar Maung Wi Yan Lin-a chu zawi zawiin a rawn tha chho leh ta a, kumin hian Class I, a zir leh thei ta ni.
