Chin state Tedim khua atanga mel 30 vela hla, Gaw-Sin khaw bulah tun thla ni 17 khan Zomi Revolution Army (ZRA) leh Chin National Front CNF/CNA Chinland Denfese Force tangrualte chu an inkap a, chu inkahna a chhuah chhan chu Chin National Front (CNF) thupuangtu Salai Thetni-an heti hian a sawi a.
“December ni 17-ah keini lam CNA, tualchhung venghimtu pawl CDF-Hualngo, Zoland PDF, ZNDF tangrual leh ZRO te chu kan chet tlatna leh operation neihna hmunah kan inkap tih chu a dik a. Chu inkahna chhuahn chhan tak chu Hakha sipai tactical command leh ZRA inkara indawrna mai bakah Tedim-a awm sipai council te ZRA inkarah pawh inbiakna a awm a, keini CNA leh tualchhung venghimtu pawlte nuaibo tur tih thu chu CDM lutte hnen atanga hriat a ni a. Chuvangin, December ni 17-ah kan chet tlatna hmunah an lo lut ta niin, kan pawm a, inkahna a chhuak ta a ni. Anni lamin min kah hmasak hnuah mahni invenhim nan kan bei let ve a, inkahna chu a chhuak zui ta bawk a ni.”
Hei hi ZRA leh CNF/CNA, Chinland venghimtu pawl te inkarah inkahna chhuak hmasa ber a ni a, chu inkahnaa ZRA lamah mi 5 an thi a, CNA leh tualchhung venghimtu pawl lamah tumah thi leh hliam an awm loh thu Salai Thetni chuan a sawi a.
Zomi Revolution Army (ZRA) pawl hi India hmar chhak Manipur state-a ram chhung buaina avangin, kum 1993 hnu lamah ralthuam kengin an indin a. ZRA rawn pian chhuahna ber chu Zomi Reunification Organization (ZRO) niin, ZRO president chu kum 1990 inthlana Chin state, Tonzang township atanga thlan tlin Zomi National Congress party-a Pu Thang Lian Pau a ni.
Kum 2005 hnu lamah ZRO/ZRA pawl chu India sorkar nen inremna thuthlung ziakin border guard anga awmin, Manipur state Churachanpur-ah an awm a, Myanmar politics lamah pawh inrawlh thukna a nei lem lo.
Mahse, Febuary ni 1-a Myanmar rama sipaiin thuneihna an lak hnuah Myanmar Spring Revolution-a an tel ve mipuiin beisei viau mah se, revolution tibuaitu pawl pakhat ang lek an nih takt hu hming tarlan loh Zomi thalai hruaitu zinga mi pakhat chuan heti hian a sawi a.
“Myanmar ram chhung thilah tel vena engmah an nei lo, tuna spring revolution a lo thlen takah chuan beiseina sang tak, engemaw ang tala ralthuam keng pawl an nihnaa an tel ve ngei, ZRA hi kan beisei a. An hnenah pawh tanpuina dil a ni a. Chutah chuan phai lama awm leh tlang rama awmte chu sipai training pe a, ralthuam pe bawk tura ngen a ni a. Mahse anni lamah India sorkar nen inremna thuthlung an lo ziah tawh vang pawh a ni ang, spring revolution-ah an rawn tel lova. An tel loh bakah awm mai mai lovin, revolution-a telte tibuaitu pawl an rawn ni chho ta bawk a ni.”
ZRA pawl hian CNA lam nena an inkah hma pawhin Tedim township chhungah ralthuam keng pawl dang din an pawm loh thu leh sipai thuneihna dodaltu Tedim township chhunga mipui sipai PDF-Zoland, CDF- Tonzang camp chu luh chhuahin an tihchhiatsak a.
Chubakah, December ni 5 pawhin PDF-Zoland hruaitu Pu Chin-Sian-Suan chu ZRA sipaiten Tedim khuaah an kap hlum bawk a ni.
ZRA pawl kal dan firfiak tak avangin, Tedim, Tonzang lama awm, Chinland Defense pawl tan chet chhuah a tih harsat thu Chin mipui venghimtu pawl 17 inzawmkhawm Chinland Join Defense Force –CJDC thupuangtu Ko Paul chuan heti hian a sawi a ni.
“Zomi ramah ZRA bakah tumah ralthuam keng pawl an awm tur a ni lo tih policy an neih avangin, keini CJDC pawl member PDF-Zoland, CDF-Tonzang te tan chet chhuah a harsat phah hle a. ZRA lamin min rawn tihbuai theih reng avang leh sipai thuneihna paihthlak tum pawlho an rawn khawih tak avangin, ZRA te min tihbuaina chu tun ai pawhin a la nasa mai thei a ni.”
ZRA hian Chinland Join Defense Force –CJDC pawl member, tualchhung venghimtu pawlte a bei leh a nih chuan, CJDC pawhin a bei let ve zel dawn a ni tiin Ko Paul chuan a sawi bawk a ni.
