Sipai thuneihna paihthlak tuma bei mek mipui venghimtu pawl Chinland Defense Force (CDF), Generation Z leh Chin National Defense Force (CNDF) te Chin National Front (CNF)-in training a pek dan leh an thawhho dan chungchanga CNF aiawha thusawitu Pu Thet Ni kawmna hi lo ngaithla ila.
Zawhna: Chin State-ah hian mipui veng himtu pawl PDF hi Township hrang hrangah an awm a. Heng PDF te hian Military council te hi an do reng a. Township hrang hranga heng pawlte hi CNF hian Training inpe tih kan hria a. A nih leh, heng pawl hrang hrang te nen hian engtin nge in infin theih a, engtin nge in awm tak zel. Min hrilh thei ang em?
Chhanna: Ni khawp mai, keini chu PDF leh CDF hi a ni mai. He Min Aung Hlaing-a’n sorkarna a pawng lak hnu hian Generation Z te hian ralthuam an keng ve a, Keini CNF chauh kan ni lo. A ram leilung fa te hian chhim leh hmar, chhak leh thlang tangrualin he Revolution hi kan do let dawn a, he ti hian kan lo awm ta ni.
Ti hian kan inhui khawm a, ram chhunga man theih an nihna laiah PDF tiin ram pawnah an awm ta a. Keini pawh CDF hi Chinland tih a ni ta a, CNDF tih pawhin a theih tho. Nimah se, an thil tum ber politic huanga ruahmanna leh a target-ah kan inang vek a. Sipai thuneihna kan hnehchhuh leh chuan zirna an chhunzawm leh thei ang a, hna hrang hrang an thawk leh thei dawn a ni, Kan tum ram chu a inang ve ve a ni.
Zawhna: CNF ten Training in pek hian engtin nge ralrel dan in zirtir thin. In boruak tawn dan te min hrilh thei ang em?
Chhanna: Kan Training pek dan ber chu rawlrala (guerrilla) beih dan a ni rih phawt mai. Ni 10 chhung emaw ni 15 chhung emaw leh khawpui chhungah a ruka chet dan a ni a. A Aw B anga zir a ni hran lo.
A tirah chuan Victoria Headquaters hmunah kan tan phawt a. A hnuah chuan kawng te a that vak loh avangin an awmna Camp-ah kalin kan zirtir thin. Hmun dangah pawh hetiang bawkin zirtirtute nen kan thlen chilh mai thin.
Zawhna: Zirtu leh zirtirtu teah harsatna in tawk em. Zirlaite rilru puthmang engtin nge i hmuh dan?
Chhanna: Harsatna tihah chuan CNF te hi ralthuam keng a nih angin Chin Hill tlangdung a, Politic, Economy, Social Life- boruakah a awm mai thei. A pawimawh bera chu sum leh pai, ei leh in leh awmna hmun ramah a ni ber a. Keini chu hetiang hian kum 30 tal tawp kan lo paltlang tawh a.
CDF leh PDF te Sipai kut hnuaiah kan la awm a, hma lam thlir chung zela bei fat fat an nihna laiah rin aiin an tawrh a chhel khawp mai.An inpekna a ropui a, inkahnaah an hneh loh chanin an rilru a nat poh leh member thar an pung deuh deuh a,chutiang vel chu a ni ber mai.
Zawhna: CNF chhawmdawlna avanga tun tlenga Camp-a zirte hi mi eng zah vel angin nih tawh ang?
Chhanna: Tuna Central Headquarter-a zirlaite hi mi 4000 chuang an ni a. Central Headquarter-ah zirtir vek theih an nih loh avangin hmun dangah an awm
nual a, hei aiin kan thahnem hle ang. Mi 4000-5000 tan siam belh a ngai mai thei a, a tlangpuia chhut dawn chuan mi 10000 dawn vel kan awm mai thei.
Zawhna: CDF/DPF inkahnaah CNF hi a tel ve em? Engti kawng zawngin nge a tel ve?
Chhanna: Keini chuan CDF leh PDF te hi Training kan pek zawha an chetnaah, NUG nen inremnaa ralrel kawnga comment and control thuah CNF-in mawhphurhna a la a. Inkahnaa kan puih theihna ber chu thiamna leh puak thei thil siam leh hman dan a ni mai a. Chung chu kan zirtir tawh a.
Keini chuan ralthuam leh member an indaih lohna emaw an chak lohna emaw lamah kan pui a, hmun hrang hranga awmte pawh kan theih tawkin kan pui mek zel a ni.
Zawhna: A nih leh sawi duh dang i nei em le. Thuchah te pawh?
Chhanna: Tun hunah hian phai leh tlang rama awm tu pawh inthliar hranna awm lovin he Revolution atana ke, pen chhuah mi zawng zawng tihmakmawh a ni a. Kan hmalaknaah hian min tibuaitu te an awm mai thei. CDF leh PDF ten Sipaite an dona turah pawh hian mimal leh pawl dangin min bei mai thei bawk. Tun hma ang kha chuan a theih tawh dawn lova. Eng pawh ni se, kan thawh duh loh leh kan tanpui thei lo a nih pawhin min tibuai suh se. He Military council hnuaiah hian tumah an awm duh lo. Mahse, heng min do lettu te hi chhungkaw tan leh hlauh vanga thawk ve mai mai an ni a. Chuvangin, min tibuai lo se. He Revolution hlawhtlin nan hian tute pawhin mawhphurhna kan nei vek a, tangruala kan beih ho a ngai tih hi infuih nan i hmang zel ang u.
