Chin State, Thlantlang township, Tlanglo khua Military council sipaiten April 27, chawhnu dar 3:00 vel khan Jet Fighter-a bomb an thlaknaah tualchhung mi 2 an boral a, mi 5 aia tlem lo an hliam thu hriat a ni a.
Chin National Front hmunpui Victoria camp atanga mel 7 vela hla Tlanglo khua Military council sipaiten Jet Fighter-in April 27 chawhnu dar 3:00 khan an bomb a.
Military council sipaiten an bomb-naah Tlanglo khuaa CDM zirtirtu Dimte leh Pu Hram Ceu te an boral a, mi 5 aia tlem lo an hliam thu hriat a ni a. Heng bakah chenna in 5 an bomb chhiat thu hriat a ni bawk.
April 27 tuka an beihnaah Halkha leh Thlantlang khaw inkar Timit luipui kianga Military council sipaite camp an hloh a, khawchhung an kah chiam thu hriat a ni bawk.
CNA leh PDF tangrual pawlten April 26 zing dar 1:00 vel khan Timit luipui kianga Military council sipai camp an laksak a, camp dang 2 laksak leh an tum mek laiin Military council sipaiten Jet Fighter-in an bomb hnuah an kirsan leh thu hriat a ni.
Timit luipui kianga Military council sipai camp an beihnaah CNA sipai pakhat a boral a, Military council sipai thi leh hliam an awm nual thu hriat a ni bawk.
Military council sipaiten March 30 atanga April 27 thleng, thla khat chhung deuhthaw Chin State, Jet Fighter-a an beihnaah tualchhung mi 23 an boral tawh a ni.
