CNLD Party te Military te huaihawt in thlanpui turah ram hminga an in register dawn loh thu an Party hruaitu Gen. Secretary U Shaing Tun chuan a sawi a ni.
“Tunah rih chuan kan in register dawn rih lo, Party dang nen kan inhmuh tur chungchangah hun kan pe thei rih lo. Boruak a that loh avangin a rem thei rih lova, Chin State atanga Party inhuaihawt tur chungchangah a harsa tawh a ni. Kan dinhmun enin in register loh hi kan tan a tha” tiin CNLD pawla Gen. secretary member U Shiang Tin chuan a sawi a ni.
Military council ten ram chhunga Party in register turin kum 2023 January 26 khan dan thar a duang a. He dan thar angin ni 60 chhungin ram chhungah in register turin thupek an chhuah a, hun tiam chhunga in register lo te chu ram chhung Party atan hnawl an nih thu an tarlang a ni.
Chin Party 3 infin khawm CNLD Party hi Chin Party zinga Party lian tak a ni a. Kum 2020 inthlanpuiah pawh khan Chin State bakah Sagaing region, Magwe region leh Rakhine State-ah Constituency 50 chuang chuhtu Party an awm a.
Tun dinhmun rihah chuan CNLD Party te hian ram chhung Party atan in register an tum rih lova, ram chhung dan angin Party atan hnawl an nih thu Gen. secretary chuan hetia hian a sawi a ni.
“Party chu an hnawl ngei dawn avangin mipui ten Chin Party-ah kan ngaih pawimawh zual a tul a. Chumi hnuah Sagaing, Magwe leh Rakhine-ah ni 60 chhunga in register tura an tihnaah tanrualna a awm hran lova. Ram chhunga hming bo lo turin leh mipui kan dawr zel ang” tiin CNLD Gen. Shaing Tun chuan a sawi a ni.
Chin State-ah hian CNLD bakah Zomi Congress for Democracy Party, Khumi National Party, Ethnic Groups Development Party, Zo ethnic regional development party, Chin Ethnic Party, Asho Chin National Party te an awm a, vawiin thlengin ram chhung Party-ah an la ziah luh loh thu hriat a ni.
Military council ten Party hrang hrang te in register turin an ngen nasa hle a, eng tik hunah nge inthlanpui a buatsaih dawn tih chiang takin an la puang rih lova. Ramchhung dinhmun chhuttu te chuan ram chhung buaina avangin inthlanpui an buatsaih an ring lova. Tunah rih chuan ramchhungah Party hrang hrang in ziak lut tawh 20 chuang an awm tawh thu hriat a ni.
