Kalay-Kabaw (Kalaymyo leh Tamu huam chhung)-a CNO/CNDF-UCR pawlten June thla chhunga thubuai relna hmunah thubuai 14 an chin fel thu CNO/CNDF-UCR-ten an thuchhuah an tar lang a.
Thubuai an rel zingah thubuai 10 te hi ruitheihthil kaihhnawih a ni a, ruihhlo ngai thubuai 5 te chu thla 2 atanga thla 3 thleng tang turin an hrem thu hriat a ni a.
Ruihtheihthil zuar thubuai 5 te pawh thla 2 atanga thla 5 chhung tang tura hrem an nih bakah Kyats nuai 3 atanga nuai 50 thleng chawi tura hrem an ni bawk.
Thubuai dang hmun ram thubuai 4 te chu Chin Act hmangin chin fel leh tur a nih thu hriat a ni a. Ruihtheihthil an man Sahbawn bawm 17 te chu hal ral vek a nih thu hriat a ni bawk.
Hetia rei lo te an hremna chhan chungchangah roreltu zinga thuneitu pakhat chuan “kan awmna hmun hi fimkhur a tul avangin rei tak kan enkawl thei rih lo” tiin a sawi a.
Thubuai dang te pawh hmalak chhunzawm zel tum a ni a, mipuite hriata tar lan kan tum zel ang tiin an sawi zui bawk a ni.
