Geneva base-ah IPU tia koh Inter-Parliamentary Union vawi 146-na Assembly Bahrain, Panama khawpuia an neihnaah CRPH leh NUG. palai MP Dr. Win Myat Aye-an thu a sawi a.
He a thu sawinaah hian Myanmar ramah mipuite thlan tlin MLA leh MP bakah sorkar thuneitute, Military council sipai ten an man a, a thah thin avangin ram hrang hrang ten action la turin leh CRPH/NUG sorkar hi dan anga sorkar puitlingah nemnghet turin a ngen a ni.
Assembly-a tel palai zawng zawng te hnenah CRPH leh NUG hi sorkar puitling a nih theih nan Dr. Win Myat Aye chuan a sawi a. Myanmar-ah Democracy leh human right dik taka hman a nih theih nan CRPH leh ram hrang hrang te nen thawkho turin Dr. Win Myat Aye chuan a ngen a ni.
Heng bakah hian Military council-te beihna avanga Myanmar raltlante tan chhawmdawl a nih theih nan palai kal khawm ten an sorkar theuhah pu lut turin a sawi tel bawk a ni.
Association of Southeast Asian Nations (ASEAN) ten five-point consensus an duan angin a rang thei ang bera hma la turin leh Military council sipai ten mipui an man leh thahna chungchangah pawh titawp thuai turin a sawi tel bawk a ni.
Military council sipai ten mipuiah human right an pal zut a, mihring an suatna avangin ram hrang hrang ten action la turin Dr. Win Myat Aye chuan a sawi tel bawk a ni.
Military council sipai ten intlannaa mipui thlan tlin MLA, MP leh sorkar hruaitu mi 3000 chuang an that tawh a, MP 100 chuang telin mipui 10000 chuang an man tawh thu Dr. Win Myat Aye chuan a pharh tel bawk a ni. Military council sipai ten chung lam Thlawhna hmanga an beihnaah tualchhung mipui a nuai tel in leh lo an tlansan thu leh Myanmar-in harsatna a tawh zual thu a sawi fiah bawk a ni.
He Assembly-ah hian khawvel hram hrang hranga MP leh MP Chairman te bakah dan lam mi thiam leh sokar hruaitu mi lian tam tak an tel a, March 15 thleng a awh a ni.
