Rakhein State-ah Cyclone thlipui lut thei tura an rin avangin tuipui kama awm te leh ruam chhehvela awm mipui 40000 chuang te AA (Arakan Army) security-ten chenna hmun leh ei leh in bakah a tul tul an chhawmdawm mek thu AA thupuangtu U Khaing Thu Kha chuan RFA Media a hrilh a.
Cyclone thlipui rawn luhna tura an rin Sittwe (Sit Tui), Pauk Taw, Mey Pone, Pong Na Kyun (Pung Na Chun), MaungTaw township leh township dangten tualchhung mite an tanpui thu a sawi a.
“Keini AA te hian Cyclone thlipui a rawn thlen hmain tuipui kam leh ruam chhehvela awm mipuite an him zawk theih nan tiin hmun him lamah sawn chhuahtirin an awmna tur kan buatsaih hlawm a. May 10 atang khan vawiin thlengin an la inthliar chhuak reng a, tuna kan hriat chinah chuan mi 50000 vel an tling tawh ang” tiin a sawi a ni.
Tawm hulna tur Bawkte leh Thlam kan siamsak bakah ei in leh silhfen, damdawi chenin kan ngaihtuahsak tiin a sawi zui bawk a ni.
Meteorology & Hydrology Department hmunpui atanga an teh dan chuan Bay of Bengal hmun laili vela Cyclone in mung mek MOCHA cyclone hi May 12 atangin a nasa zual a, darkar khatah mel 110 vela chakin a thleh theih thu an tar lang a ni.
MOCHA cyclone hi May 14-ah Bangladesh, Cox's Bazar khawpui atangin Myanmar, KyuakPhyu (Chauh Phiu) khawpui inkar, Sittwe khawpui bul hnai atangin a rawn luh theih an rin thu an sawi bawk a ni.
