Myanmar mipuite aiawhtu NUG chuan indona pahnih a chawhchhuah a ngai dawn a. Pakhat chu military training nei mek leh zo tawhte tan D-Day a puansak a ngai dawn a.
Pahnihna chu thla leh September ni 14-a neih tur UN General Assembly-ah seat pakhat chang tura an beih a ngai dawn a. UN-ah Military council palai lehthala NUG palai pawmtir chu indona pawimawh tak a ni dawn.
September thla chhunga New York khawpuia UN Assembly neih turah khawvel ram hruaitute chu an inrawn ru tan tawh a. Boruak chu a tha leh a chhia inkarah a la awm a. He Assembly-ah hian khawvel puma President, Prime Minister, Palaite leh Dictator thenkhat an tel dawn a. He Assembly hian Military council aiawh UN palai chu a pawm ang em? Nge ni, mipui aiawh democracy palai a pawm zawk ang? tih chu chiang takin thutlukna a siam dawn a. Mipui lama chan that zawkna pakhat chu UN General Assembly (UNGA) hian tun thlengin thlantlin sorkar chu a la pawm reng a ni. UNGA hian November ni 8, 2020-a mipui thlan tlin democracy sorkar leh mipuite vote chu zah turin Military council chu vawi engemaw zat vaukhanna a lo pe tawh bawk a.
UN palai pakhat chuan, “NUG palai pakhat chauh September thlaah Myanmar ram aiawha pawm a nih chuan, Myanmar ram hi democracy revolution kawngah mipuite tan chhinchiah tlak entawn tur a ni ang,” tiin a sawi a.
Han belhchianin, NUG hi khawvel palai hnaah chuan thil a tithei hle a. UN General Assembly-in NUG hi a pawm a nih chuan military council ralthuam keng thenkhat chu an beidawng thei dawn a. Tlan chhia, intihlum pawh an awm thei ang. A nih loh pawn a tawp nan suahsual an chhuah vak pawh a ni thei.
NUG kalphung hi a dikin a la kaltluang zel a tih theih a. A chhan chu Dr. SaSa leh U Kyaw Moe Tun chu UN lamah an chet tlattir a. Dr. SaSa chu England, Franch, Norway, Finland, Germany, Swiss, Italay leh Turmey ang chi ram thiltithei hmin thei tura a chet ang bawkin, U Kyaw Moe Tun pawh US-in full support an pe a ni.
Chu bakah NUG chuan PDF thalaite military training a neihtir a. CDM leh mipui tan ruahmanna (plan) thui tak a siam a. Chuvangin, September Assembly hi D-Day atan a pawimawh hle a. Assembly-in engtin pawn thutlukna lo siam mah se, NUG chuan engtia chet lak zel tur nge tih chu ruahmanna tha ber a lo neih lawk tawh pawh a rinawm a ni.
