Kayin Ni State, Demoso township ni chhuahna lam Daw Law Khu khaw bul Ngi Bu Khu tlanga Military council sipai operation te leh Kayin Ni revolution pawl te inbeihnaah Military council sipai 15 chuang an thi a, hliam an awm nual thu KNDF Battalion 1, ten March 31 khan an thuchhuahah an tarlang a.
Daw Law Khu khaw bul Ngi Bu Khu tlangah March 29,30 chhung khan Military council sipai Khah Lah Yah (LIB) 287 Battalion leh KA, KNDF te inbeihnaah Military council sipaite thi leh hliam an awm nual bawk.
He inbeihnaah hian KA, KNDF pathum KNDF/B 10, KNDF/B 15, KNDF/B 7 ten an beih rawn thu hriat a ni a.
He ni 2 inkahnaah hian KA leh KNDF tangrual zingaah hliam an awm thu hriat a ni a. Military council sipaite hnen atangin MA-1 silai 3, MA-2 silai 2, MA-3 silai 1 leh ralthuam hmanraw tam tak an laksak nual thu KNDF Battation 1 ten an thuchhuahah an tarlang.
He inkahnaah Military council sipaite thi leh hliam an tam avangin March 30 chawhnu khan Jet Fighter-in Daw Law Khu khua tlangah vawi 10 zet an bomb a.
Heng bakah hian inkah buaina awm lovin khaw pakhata zirna school vawi 2 meuh an bomb-naah tualchhung mi pakhat a hliam thu KNDF ten an thuchhuahah an tarlang bawk a ni.
March 31 zan pawh khan Military council sipai ten Daw Ta Ma Gyi khua tlangah Jet Fighter-in vawi 2 an bomb leh thu hriat a ni a.
Kayin Ni State leh Shan State chhim lama Military council sipai operation lut te Kayin Ni tangrual pawl ten ni tin an la inkap zel a, an hmachhawnna zelna turah tanpui an mamawh zual thu KNDF ten mipui te a ngen a ni.
