Dr. SaSa ni tura lo piang, kum khata vawi khat chiah in bual thin Leilenpi naupang chu a Pain Doctor a ni dawn a tih chuan khaw miten a pa chu mi a emaw an ti a.
Thil chu a tak en ringawta thutlukna siam theih a ni lo. Hmun pakhata mi thiam an awm chuan chu hmun nakin hun tur chu sawi lawk chi a ni lo. Engpawh a thleng thei a. Dr. SaSa chuan, ‘The greatest gift we can give to the younger generation is education. They will be able to do so many things. Just watch we will change their story (Chhuan tharte tana kan thil pek thei hlu ber chu thiamna a ni. Anni chuan thil tam tak an ti thei a. Lo ngai reng rawh, an chanchin chu kan thlak danglam ang),’ tiin a sawi a ni.
Dr. SaSa chu ruah sur ni, zing lama piang a ni a. A pian ni, thla leh kum pawh a hre lo. A nu chu ziak leh chhiar thiam lo a ni a, a pa erawh pawl 1 pass a ni. Nau chhartu an awm lo va, school a awm lo a, chuvangin, Dr. SaSa-a pian ni chu tumahin an hre lo, a pian ni chu ruah sur ni tuk zing lam a ni tawp mai.
(Tap chhakah a nuin a neih avangin, medical collage-a a kal dawna a bio-data a ziah chu school-in an ring lo a ni awm e.)
Kum 13 mi a nihin an khuaah lehkha zirzawmna tur a awm tawh lo a, zir zawm tumin Rangoon khawpuiah an khaw mite ar pekte phurin amahin a lut ve rawi a. Kea kalin kawngah ni 20 a thang a ni. A school fee atan a ar phur chu zuarin kawngah a zo vek a.
Kum khatah vawi khat vel chiah inbual thin, sam sei tak, hrik ngah em em, kawl tawng thiam that hum lo chu Yangon a thleng chuan Line bus driver-in mi sualah ngaiin a lo tlawh thla a ni awm e.
Hna thawh tur awm ang ang thawkin kum 1997-ah pawl sawm a pass a. Degree pakhat tal lak duh mah se, University lam khar a nih vangin an khua Lailenpi-ah a haw leh a. Rangoon atanga haw, lehkha thiam tih takah an khaw miten zirtirtu atan an sawm a, Lailenpi-ah kum hnih zirtir hna a thawk a. An khuaa a awm laia a thil hmuh pakhat chu, khaw mite chhan chi hrang hrang avangin, an thi thin tih a ni a. A lehkha zirtir naupangte pathum chu khaw tha lo, santen avangin an thi a, a tuar hle a. Chu mi hnuah an chhungte zinga raipuar pawh a thi bawk a, chutah chuan doctor an mamawh zia a hre chhuak ta a. Sorkar lam atangin enkawlna engmah an dawng lo a, khaw chhung mite lahin hriselna lamah hriatna an nei bawk lo a, chuvangin keimah hian damdawi lam thiamna chu kan zir a ngai a ni tiin thutlukna a siam ta a ni.
Kum 1999-ah an khaw mite tangrualin India lamah an thawn a. Khaw mite pek arte chu phurin India lamah a kai ringawt a, police-in lo hmuin rukru-ah an ngai a, a ar phurhte ei sakin, ani chu lockup-ah an dah zui a. Mahse a hnuah Delhi chu engtin tin emaw a thleng a. Collage kal turin admission a dil a. Western dress lo chuan admission a tih theih loh an lo tih avangin, kekaw tlawn man tlawm ber chi a lei a, kawr erawh a thiante ta a hawh a, a tawt viau leh nghal a. A kekawtlawn lei lah chu hmeichhe hak chi a lo nia, school lamin tuaiah a lo ngai leh bawk a.
Collage 33-ah admission dil mah se, a hmu zo lo a. A tawpah collage pakhatin an lo remti a. Chutah zirin a mark hmuhin medical line a pha a, a hnuah Prospect Burma school nen an inbe pawp ta a.
Prospect Burma school chu Daw Aung San Suu Kyi-i Noble price (lawmman) lak sum, a then a zar rinchhana hawn New Delhi-a school pakhat a ni a. Myanmar lam atanga raltlante saptawng, computer lam kaihhnawih a thlawna zirtirna school a nih rualin, scholarship te an pek bakah, kal kawng man, zirlaibute a thlawn vekin an pe bawk thin a ni.
Saptawng thiam tha em em lo, SaSa chuan a thiam ang tawkin doctor a nih duh chhante chu a hrilhfiah a, a tawpah Prospect Bruma chuan SaSa chu scholarship (tanpuina) pe turin thutlukna a siam ta a. Mahse, school kal man sanna London angah chuan an tihsak thei lova, mipui maktaduai 3 vel chauh awmna Armenia ramah doctor, a kum khatna zir nan chauh an tanpui thei a ni.
A eiin, chenna tur chu amaha a todelh a ngai dawn a, a fail vaih chuan tanpuina pek chhunzawm a ni lovang tih a ni a, Armenia ram a thlen chuan a thawh theih ang ang thawkin, Library lamah lehkhabu leh a kalpuite lehkha hawh kualin fail lo turin a bei nasa hle a.
A chanchin hria mi hausa leh thil tithei tak nupa khat chuan amah rawn hmuin a car lehna tur Dollar 5000 a pe a. A haw kawnga a rilruah chuan, ‘car lei a, Armenian nula zirlai ho nena han chuanho vel te chu a mitthla a,’ mahse a room a thlen chuan a ngaihtuahna chu a inthlak leh vek a. A chhan chu ni hnih khat maia a lehkha dawn, an khuaa tui harsat zia leh tui in tur la a, tlang sang tak takah nunna thapa kal a ngaih thu te chuan, a kuta a hum lai dollar 5000 chu a mamawh zawk a khaw mite tana tui lakna tur pipe vel lei nan a thutlukna a siamtir ta daih a. An khua chu a theihnghilh thei lo a ni.
A kum thumna medical student a nih lai, kum 2008 khan Britian lal ni tur Charles nen London khawpuia Abbey Gardens, Westminster hmunah ngat an inhmu a. Chu mi tum chuan lal chhungkaw inchibai dan leh inbiak dan te chu a la thiam lo a, Lal in luhna step atanga rawn chhuk Prince Charles chuan, ‘saw kawr ze chei tial tak ha saw tu nge’ tih pahin a banah a rawn vuan chawt a, a hrana inzahna chibai buk ang chi chu a pumpelh ta hlauh a. SaSa-a inbel Chin tuam chu “colorful and beautiful” tiin lal fapa chuan vawi 5 vel a sawi a ni awm e. Chutih rualin SaSa pawhin Chin state-a kum 50 dana mau par rah thin leh sazu puang avanga Mautam thleng thin te hrilhfiahna hun a nei a.
Tichuan, London atanga a haw lam chuan Chin state mipui tam leh damlo mi 3757 tan tanpuina damdawi leh buhfai bag 759 man zet Lal pafa hnen atangin a dawng a ni.
Kum 2009-ah Armenia University atangin SaSa chuan doctorate degree a la thei ta a. Prospect Bruma tanpuina leh amah thawhrimna zarah a tih theih awm e. Doctor degree a lak hnuah amah chawmtu a Nu hnenah awmin, British Parliament member-te leh mi thil tithei tak takte nen kum khat vel chu a khawsa a. Chu mi hnuah a khaw lam haw tumin a inpuahchhah leh a, London lama a thiante chuan London-a awm thei i nia, hetah awm hlen zawk mai rawh tiin an lo sawi ve cham chi a. Mahse, an khaw hriselna leh tihhmasawnna tumna rilru nei rana lekha zir chhuak Dr. SaSa chu motor kawngpui, traffic light leh tun lai hmanrua awm lohna an khaw lamah bawk chuan a let leh ta a ni.
An khua a thlen chuan an khaw chhunga mite leh khaw thenawma mite chu a enkawl nghal char char a, ni khatah damlo 400 chuang a en thin a. Chawlhkar hnih hnuah chuan a hah lutuk chu damlo zawkah a tang lek lek a. Chutiang renga kal chu ni thei dawnin a hre lova, khaw tinah basic health worker neih a ngai tiin, khaw pakhat atangin mi pahnih zel khaw 147-ah basic health worker thawktu turte zirtirna pek hna chu kum 2009 atangin an tan ta a.
A zirlaibu hman chu “Where there is no Doctor” (Doctor awm lohna hmunah) tih lehkhabu a ni a, zirlaite chu Thermometer leh benga ngaihthlakna, thisen tehna pakhat theuh a pe a. Prospect Burma leh tanpuitu pawl dangte tanpuina hmangin basic health worker 300 chuang trained chhuakin Chin mipui nuai khat chuangte hriselna chu enkawl theihin a lo awm ta a.
Chu mi hnuah, chu project hming chu Health and Hope (Hriselna leh Beiseina) tih hming chawiin Dr. SaSa foundation chu din a ni a, chu foundation-ah Lal fapa Charles chu Chairman a ni a, chu foundation chuan Chin state-a thalai mi 100 chuang chu ram dangah lehkha a zirtir zui ta bawk a ni.
A dikna, a thawhrimna leh a tumruhna chuan an khuaah motor kawngpui a laih tlangtir, hriselna leh zirna lamah pawh an khua leh a chheh vel chawikanin an awm a, a thil tum ang ngeiin an khuaah thlawhna te chi tum theihna airport hial a sa thei bawk a. World bank hotu (chairman) lah Armenia mi niin, Dr. SaSa nen pawh an inhre tha hle a, chung tanpuina hmangin tunlai damdawi in changkang tak te, Collage te hawn leh theih ngei tumin a bei zel a.
Mahse, February ni 1, 2021-a sipaiin thuneihna an pawng lak takah chuan a thil tum tam tak chu tihhlawhtlin theih a ni rih dawn lo a. Mahse, ram leh hnam tana mi inpe leh inhmang tih takah NUG sorkarah Minister of International Cooperation nihna hial pek niin, tun thlengin a hna chu tlin takin a la thawk zel a ni.
