Chin hill Kalaymyo chhim lam leh Chin state hmar lam Falam township-ah military council sipaite leh Chin mipui venghimtu pawlte inkarah inkahnaa a chhuak a, military council lamah thi an tamin an nat hle thu hriat a ni.
February ni 15 khan Chin state Falam township atangin sipai motor 23 chu Kalaymyo lamah an chhuk thla a, chawhnu dar 1 velah CDM-Siyin leh PDF Zoland tangrual pawlin bomb-in an bei a, sipai 10 chuang, an ruang darh veka, lak hleih theih loha a awm thu CDM-Siyin thupuangtu pakhat chuan heti hian a sawi.
“Military council lamah force 100 chuang an awm a, chung zingah chuan bomb kam sut thiamte awmin, ramhnuai lam atanga rawn zuitute chu ramhnuai lamah bomb kamin kan lo chang a. Bomb kan tih puah rualin sipai 10 vel chu an ruang chhar theih loh khawpin an darh sawm a, hliam pawh an awm nual bawk a ni.”
Military council sipaite chu Falam khua atanga Kalaymyo lama chhuk thlakna Falam-Kalaymyo kawngpui Var Lung khua leh Taingen khaw inkarah bomb-a beih an ni a, CDM-Siyin/ PDF-Zoland lamah erawh tumawh thi leh hliam awm lova an tawlhsawn leh theih thu hriat a ni a.
Chin hill dep, Kalaymyo chhim lamawh pawh February ni 14 khan Chinland Defense Force (CDF)-KKG leh CDF-Hakha tangrual pawlin Yang Gyi Aung khuaa inkhuar military council sipai ho, inring lo tak thawng thutin an kap a, sipai 5 an thih thu CDF-KKG in thuchhuah an siam.
Chu inkahnaah tangrual pawl lamin silain lian leh te hmangin an bei a, sipai lam pawhin an kap let ve bawk a, darkar 1 vel zet an inkap a ni.
Chutiang bawkin February ni 12 pawhin Falam town based IB 268 atanga sipaite ration pe lo haw lam military council sipai rual chu CNDF pawlin bomb thlunzawm bawr 20 chuangin an bomb a, military council sipai 3 an thih thu CNDF lamin thuchhuah an siam bawk a.
Kalaymyo township-ah February thla tir atangin PDF (Kalay), CDF-KKG, CDF-Hakha leh Pa-Ka-Pha tangrual pawl inkarah inkahna nasa tak a chhuak chho leh a, military council sipai lamah 80 chuang an thi a, tangrual pawl lamah 5 an thih thu PDF-Kalay pawlin thuchhuah an siam tih hriat a ni.
