Chin State Falam khawpui Varung khua, Thin Suh camp inkarah March 14 khan Military council sipai te leh CNDF te an inkap nasa hle a, Military council sipai thi leh hliam an awm nual thu hriat a ni.
Kalaymyo khawpui atanga Falam khawpuia pan mek Military council sipai te, March 14 chawhnu khan Varung khua leh Thin Suh camp inkarah, inkahna a thlen thu CNDF Battalion commander leh operation leader Lian No chuan a sawi a ni.
“Keini chuan chawhnu dar 12:00 vel khan Varung khua leh Thin Suh camp inkarah bomb kam hmang leh sniper-in kan bei a. Motor pakhat chu a chhe vek a. motor 2 pawh a hliam nual a, thi leh hliam zat kan la hre rih lo. Ani pawh kan motor a chhiat avangin an kal tlang thei lo, boruak erawh a tang khawp mai” tiin Khonumthung Media a hrilh a ni.
Military council sipai ten March 7,9 khan armor 2 leh Military council sipai motor 30 chuangin Kalaymyo atangin Chin Hill-ah an chhova, Falam leh Halkha khawpuia Military council sipai tan ration an phurh thu hriat a ni.
Heng Military council sipai te hi March 11 khan CDM Siyin leh EMDF tang dun ten vawi 10 chuang an beih tawhnaah Military council sipai 6 an thi tawh a, hliam an awm nual thu CDM Siyin ten an thuchhuahah an tarlang a ni.
Kalaymyo leh Falam khawpui kawngah inkahna a thlen avangin mipuite kawnga veivak lo turin CNDF ten an hriattir a ni.
Military council sipai ten March 12 atangin New Suanpi khuaa zirna school telin chenna in 3 an hal kang a. Varung khuaa chenna in an rawk bakah ran leh arva an eisak nual a, tualchhung mipuite ramhnuaiah an tlanchhiat nual thu hriat a ni.
