Gangaw-Tilin (Thi Lin)-ah, Military Council sipai ten operation hmun 4-a, an beihna Khaw 7-a, tualchhung mipuite an tlanchhe nual

0

Magwe (Ma Gui) Region, Gangaw leh Tilin township-ah Military Council sipai ten operation an beihnaah, PDF te nen an inkah avangin, Khaw 7 vela tualchhung mipui te sa himna zawngin an tlanchhe nual.

Raltlan zinga pa pakhat a boral thu Yaw PDF Battalion leh, tualchhung mipuite hnen atanga hriat a ni.
Gangaw township, Long Chon khaw kiangah August 22 tuk khan, Military Council sipaiten operation an neihnaah, PDF tangrual pawl te nen minute 40 chhung an inkap a.

He inkahnaah hian PDF tangrual pawl sipai 2, an kut a hliam a, Military Council sipai lam thi leh hliam zat hriat chian a nih loh thu, Yaw-PDF-a Deputy Chief of Staff, Ko Phyo (Ko Phiu) chuan a sawi.

An inkahna hmun te chu Long Chon khaw lamah pawl khat, Mit Ta, run tuikhuah atangin pawl khat, Nan Kha khaw lam atangin pawl khat, Tilin township, Kyaukhtu (Chauh Thuh) lam atangin pawl khat tiin, operation 4 hmangin Military Council sipai ten an beih thu hriat a ni.

Nan Kha khuaah August 21, tlai lam dar 4:00 vela, Military Council sipaite operation-naah raltlan Camp 1, Ambulance Car 1, raltlante in enkawlna Clinic hmun 1, an hal thu hriat a ni.  

YDF, Deputy Chief of Staff, Ko Phyo-a chuan “Military Council sipai pawl 1-ah hian sipai 100 atangin 200 vel an ni a, an inep na hle a, inkahna nasa tak a la chhuak mai thei. Military Council sipai ten tanhmun an siam avangin, Nan Kha, Myuih Le (Muih Le), Ye Shinma (Yi Sin Mah), Pa Nan, Sin Pong, Sa Be leh Kin Pan khuaa tualchhung mipuite a khawpumin an tlanchhe nual” tiin a sawi.

Gangaw township, chhim lama raltlan pakhat chuan “ Tualchhung mi ten an hlau khawp mai. Puanthuah telin tlan an tum a, Phone signal a awm bawk si lova, an mangang khawp mai. Thlai hriak lak hun ni mah se, operation a nih avangin an tlanchhiatsan a, Leilet mi ten an thlai an tlansan vek” tiin a sawi bawk.

August 21 khan Military Council sipai ten Gangaw township, chhim lamah operation an neih avangin, ruah sur karah tualchhung mi an tlanchhe nual a, tlanchhe zinga kum 50 mi, Ko Aung Tin-a chu kawng lakah a boral thu hriat a ni.

Tualchhung mi pakhat chuan “ Khawchhung chenna ina Tala an kar chhia a, inchhunga TV leh thil dang an vaw chhe nual a. Thlai leh hriak te an chil pherh vek bawk. Bawng leh Ar te talhin, an ei hmiah hmiah mai” tiin a sawi.

Gangaw township, chhim lamah, Military Council sipai ten operation an neih, thla khat chhung hian, tualchhung mipui thil; bungrua, sum leh pai, sakhaw sum tiamin Kyats Nuai 1000 chuang man an suam thu hriat a ni.

Gangaw District-ah hian PDF awpna ram a tam tial tial angin, Military Council sipai ten theihtawp chhuaha luahlan an tum avangin, Khawchhung chenna in an hal chiam a, mipui ei in tur leh ro thil te an tihchhiat nual bakah, mipui pawisawi lo an thah zel thu hriat a ni.

Share.

Leave A Reply

Exit mobile version