Magui region, Gangaw township-ah June ni 19 tlai lamah military council sipaite leh Yaw PDF (YDF) te chu an inkap a, sipai 5 an thih thu leh hliam an awm nual thu Yaw mipui venghimtu lamin thuchhuah an siam a ni.
Gangaw khua, Myitta tuikhuah resort-a inkulh sipaiten June ni 19, tlai lam dar 4:30 velah force 100 vel hmanga Yinma khaw lama opration an neih avangin, YDF battalion 14 ten kawng lakah lambunin an lo kah thu hriat a ni a.
YDF lamin 60mm mortar leh Rocet Missile hmangin an bei a, darkar chanve vel an inkah hnuah sipai 5 an thih thu leh hliam an awm nual thu YDF lamin sawiin, an lamah tumah hliam awm lova an inthiarfihlim theih thu pawh an sawi bawk a ni.
YDF pawl thupuangtu chuan, “Military council sipaite chu Yinma khaw chhung lutin chenna in pakhat an hal chhia a. Chu mi hnuah SinPon khua an suasam leh a, puithiam chu silaia nawrin thawhlawm pawisa tlingkhawm an chhuhsak a.
Mipui chu puithiam school-ah lei sia bawhtirin an thi, bengbeh, zungbung, ngun te leh mobile phone te an laksak bakah FZ bike pakhat leh Honda Click biek pakhat an chhuhsak lui bawk a ni,” tiin a sawi.
Gangaw township chhungah englai pawha inkahna a chhuah theih avangin, mipui nu lehpate chu inralting tur leh firfiak sipaite nen inhnaih taka khawsak pumpelh turin YDF lamin an hrilh lawk a.
Gangaw township chhunga Yinma khua leh SinPone khaw inkarah June ni 19 zing lamah military council sipaite leh PDF-Gangaw southern army te chu an inkap a. Chu mi inkahnaa thi leh hliam zat erawh hriat a la ni lo.
