Chin zirlai hruaitu Salai Tin Maung Oo chu General Ney Win-a kaihhruai sipai sorkarin dik lo taka an khaihlum a kum 46-na “Salai Tin Maung Oo Day” chu Myanmar ram puma Chin zirlai pawl kaihhruainain Online atang June ni 26 khan hman a ni.
Chu hun hmannaah chuan National Unity Government (NUG) acting President Du Wa La Shi La pawh telin Salai Tin Maung Oo-a rilru phut hmang ang put ve zel a pawimawh thu heti hian a sawi.
“A pawimawh ber chu a rilru put hmang, a ngaihdan te hi kan neih ve a ngai a ni. Mi dang hnenah hrilhin, chu mi chuan mi dang hnenah hrilh chhawng lehin, a tawpah sipai thuneihna a zung chawpa nuaibo a nih theih thlenga chakna min petu pakhat a nih theih avangin, hetiang hunh man hi a lawmawm hle a. Ani angin thih thleng ram hmangaihna rilru, dikna hmangaihna rilru neih i tum theuh ang u tih hi ka sawi duh a ni.”
Zoology University student Salai Tin Maung Oo chu kum 18 a nih kum, 1969-a South East Asia Students sports movement atangin politics lamah a lut tan a. Kum 1972-ah Labor Movement, 1973-ah UNO General Secretary U Than’s Movement tih ang chi-ah hmahruaia huaisenna taka lo tel tawh a ni a.
Sipai thuneitute chuan Salai Tin Maung Oo chu khai hlum mah se, a ngaihdan, a rinna te chu vawiin thlengin a la nung reng a. Sipai pheikhawk hnuaiah englai maha kuna tlawm lovin, vawiina Revolution pawh chhunzawm zel a nih thu Chin National Front (CNF) Vice-Chairman leh NUG sorkara Federal Minister nib awk Dr. Lian Hmung Sakhong chuan heti hian a sawi.
“Salai Tin Maung Oo chuan kan taksa chauh hi in tihlum thei ang, ka rinna erawh in tihlum thei lo vang tiin a sawi a. A rinna chu vawiin thlengin a la nung reng a. Tun Revolution-ah pawh chu rinna ang chiahin sipai pheikhawk hnuaiah englai maha kuna tlawm tum lohna rilru pua beih zel a ni. He Revolution hi a tlawm dawn miah lo, kan chak ngei dawn a, sipai pheikhawk hnuaiah englai mahin kan kunin kan tlawm dawn lo tih rilru puthmang nen he Revolution hi kan bei a ni. Ko Tin Maung Oo, i rinna ang bawkin keini pawh tunah kan bei ve mek a ni ti, tih hi a khar nan ka sawi duh a ni.”
Kum 1976, Hmaing Hundred Aniversary Movement thlen hma March ni 19-ah General Ne Win kaihhruai sipai sorkar chuan Salai Tin Maung Oo chu manin Insein Jail-ah an dah a. Insein jail-a thla 3 a awm hnuah June ni 26 zing lam dar 4-ah a chhungte pawh hriattir lovin, an khaihlum ta a ni.
Salai Tin Maung Oo chuan khaihlum a nih hma lawkin sipai thuneitute chu, “Ka taksa chiah hi in tihlum thei ang, ka rinna leh ka dinchhan hi chu engtikah mah in tihlum thei lovang. Nangni sipai pheikhawk hnuaiah hian engtikah mah ka kun lovang,” tia huaisen taka sawiin khaihlumna dawhsanah a lawn a ni.
Salai Tin Maung Oo chu zirlai hruaitu hriat lar tak a nih ang bawkin sipai sorkar hnuaia khahlum tawk zirlai hruaitu awmchhun pawh a ni.
