Chin state khawpui Hakhaah military council sipaiten khaw chhung luh chhuahna gate-ah tun hnai atangin an strict thar hle a, mobile phone-a VPN (Virtual Private Network) App hmuh a nih chuan manin, pawisa an chawitir zel niin Hakha khaw mi pakhat chuan heti hian a sawi.
“Thenkhat chuan VPN chi khat chauh ni lovin, 3 te an hmang a, pakhat an hmuhin sing 5 an chawitir a. Chutianga chawitir chu mi 4/5 vel an awm tawh. VPN a nib er mai. Thenkhat chu an Facebook ensakin an man bawk a, rinhleh vanga mante pawh an tam khawp mai. Thenkhat chu darkar 5 hnuah an chhuah leh a, mahse chung zinga pakhat chu chawlhkar khat hnuah chauh chhuah a ni. Ani chu phone avanga man ni lo mah se, a tihsual zawng chawpa man a ni a, Hakha atanga chhuah pawh a buaithlak khawp mai.”
February ni 16 pawh khan Hakha khua atanga Yangon service bus Hakha-Man chu Hakha khaw pawnah sipai lamin an lo check a, bus chhunga chuang thalai pathumte phone check-sakin an man zui bawk thih hriat a ni a.
Myanmar ramah sipaiin thuneihna a lak hnuah military council-in Facebook social media a khar a, Myanmar ram chhunga mipuiten Facebook chu VPN hmang chauhin an en thei tawh a. Mahse, military council lamin mipuiten chanchin thar an hriat theih loh nan VPN software te chu an check a, a hmangte an man thin bawk a ni.
“Kei pawh chanchin ka en ngai vak lo. VPN hman chauha Facebook en theih a nih avangin, VPN avangin an man thin bawk si a, VPN delete-a install that leh ziah chu phone a chhiat a hlauhawm bawk si a, install tawh lovin, eng chanchin thar mah chhiar bawk lovin, mi dang hnen atangin kan ngaithla ta zawk thin a ni.”
Hakha khaw chhunga len chhuak phone keng lo te chu police leh sipai lamin phone laktirin VPN an neih leh neih loh ensak thin a ni bawk a, politics lam thil te a awm leh awm loh pawh an check thin thu hriat a ni bawk.
VPN (Virtual Private Network) software control theihna tur chu military council lamin ruahmanna siamin phalna lova hmangte chu kum 3 thleng tan emaw cheng nuai 50 aia tam lo chawitir emaw, a nih loh pawn a pahniha hremna pek theihna Cyberlaw duanga tlangzarh tumin an bei mek a.
Myanmar ramah sipaiin thuneihna an lak atangin Chin state Hakha kha tih loh township zawng zawngah September ni 23 atangin internet tihtawp vek a ni a, mipuite chanchin thar hre lova siamin, inkahna lamah operation nasa takin an kalpui mek bawk a ni.
