Chin state, khawpui Hakha-ah October ni 20 khan tank leh sipai 400 chuang chuanna motor 50 vel chu lutin, sipaiin lo awmsate nena chuan tunah sipai 700 vel an awm tawh tih hriat a ni a.
Hakha khaw chhunga awm in 200 vel chu sipai puak leh bomb puak ri kharah hlauhthawnna an neih nasat avangin, an in leh lo an tlansan rigawt a, Chin Baptist kohhran chairman chuan military council hian sakhuana leh hnam zawnga mi nepchepin a khawsa chho a ni tiin a sawi.
Miliary council sipaite leh Hakha CDF te chu englai pawha inkap thei dinhmuna an awm tawh avangin, mipuite tan sakhaw hruaitute leh tualchhung pawl hruaituten sahimna tur hmun (safety zone) buatsaih tumin hma an la mek a, military council lam pawhin a thu chuan an remti tawh niin Chin Baptist kohhran hruaitu chuan a sawi.
Military council-in biak in halin, tum nei rana an duhna hmuna a inkulh dante chuan sakhuana leh hnam ang zawnga buaina kalpui a, Chin mite nekchep an tum dan chunchangah Chin Baptist kohhran pastor Danish Ngun Thawng Mang chuan, “A nihna takah chuan an duh dan danin mi an man a, mi inah lutin an suasam a, biak in pawh an pawisa lo a. Tum nei ranin mei an hal a, an inkulhte kan hmuh chuan keini lam chuan kan sawi tur awm chu kan sawi tawh a. Anni lamin an zawm chuang lo a. Kan tawrh dan chu sakhua, hnam inhmuhsitna, inngaihnepnaah kan ngai a ni. Mipui an thlabarin an chi-ai tawh a, silai leh bomb puak ri avangin an tlan chhe tawh bawk a ni. Khaw chhunga in 1600 velah in 200 vela awmte chu an tlan chhuak tawh a. Nimin lamah sipai motor 51 leh tank te a tel a. Froce chu 400 vel an ni. Heta awmsa nen chuan force 600 leh 700 inkar vel an ni tawh ang,” tiin a sawi.
Tun hnai hian Military council chuan Sagaing region leh Magwei region lama a beih vak hnuah Chin state lamah beihpui thlak tumin hma a la chho zel tih a hmuh theih a. Chutih rualin Chin state lama ralthuam keng pawl CNF, CDF leh CNDF te pawh an inralringin, an inpuahchah nasa hle tih hriat a ni.
