Chin state Hakha township, Hniarlawn khaw hluia awm kum 22 mi, mipa tleirawl Salai Mang Lian Sang chu military council sipaiten July ni 25-a an kah hlum thu hriat a ni.
Force 100 vel awmna military council sipaite chu Hakha khua atanga mel 7 vela hla Hniarlawn khuaah July ni 25-ah an thleng a, nursery school naupang hruai tura bike-a tlan Salai Mang Lian Sang chu military council sipaiten an kah hlum thu tualchhung mi pakhatin heti hian a sawi.
“Ani chu nimin lamah Hniarlawn khaw thara an kal tum thu kan hria a, mahse chu lamah kal lovin, Hniarlawn khaw hlui lamah an rawn kal ta zawk a, khaw chhung mi zawng zawng an tlan chhuak vek a, mahse nursery school kal lai naupangte chu an la rawn chhuak lova, a ngaihdan chuan naupangho an thih vek hlauvin va hruai tuma kal chu kah hlum a tawk ta a ni.”
Salai Mang Lian Sang chu a malpuiah silaia kah a nih hnuah kein feet 200 vel chu tlan chhe mah se, thisen a chhuah tam lutuk avangin, a thi zui ta tho a ni, tiin tualchhung mi pakhat chuan a sawi a. Salai Mang Lian Sang chu Hniarlawn biak ina a tul tul thawk thina inhlawh a ni a, khaw chhung thalai rinrawl ber pakhat a nih thu hriat a ni.
Military council sipaiten Hniarlawn an chhuahsan hnu, July ni 26-ah a ruang chu vui liama phum zui a ni a.
Military council sipaiten Hniarlawn khaw chhung, chenna in 100 vel awmna chu rawkin, thil man to, silhfen bakah ran vulhte an ruk thu tualchhung mi pakhatin heti hian a sawi.
“Chenna in 170 vel a awm a, an rawk loh in chu 50/60 vel chiah a ni a, in 100 vel chu an rawk a, pawisa, thawmhnaw, kekawr, ar leh ei turte an hmuh apiang an la vek a ni.”
Hniarlawn khua chu Hakha atanga mel 7 vela hla niin, chenna in 170 vel awmna khua a ni.
