Chin State, Halkha khuaa buk khuar mek Military council sipaiten Independent hriat rengna lungphun Khusilobo atangin CDF awmna nia an rin Timit phaitual velah ni tin ralthuam lian an kah thin thu hriat a ni a.
Military council sipaite leh CDF te inkah buaina awm lovin Military council sipaiten July 7 chawhnu lam khan Khuhsilobo, Independent hriat rengna lungphun atangin Timit phaitual hmunah ralthuam lian vawi 10 chuang an kah thu CDF-Halkha pawl te leh a hnaivai News-ten an tar lang a ni.
“Inkah tawnna an awm hran lova, Military council sipaiten Khuhsilobo, Independent hriat reng lungphun atangin an bomb reng a. Military council sipaiten Timit phai an bomb avangin CDF-ten Drone hmangin an chhang let ve a. Keini CDF sipai lam thi leh hliam an awm lova, Military council sipaite dinhmun erawh kan hre thei lo” tiin CDF-Hakha leh a hnaivai News-ten an tar lang a ni.
July 3 pawh khan Military council sipaiten Halkha leh Thantlang khaw inkar Timit phaitual bul TiDa khua chu Jet Fighter-in an bomb avangin an inkap nasa hle a.
Tun dinhmunah chuan inkah tawnna awm lovin Timit phaia Military council sipaite buk khuarna hmun chu CDF-ten Drone hmangin an bei a, Military council sipaiten ralthuam lianin an chhan let thu an sawi a.
Military council sipaite hian May thla ral atang khan Thantlang khua thunun tumin Halkha khua atangin Military council sipai 200 rual a tir chho tawh a. Tun thleng hian Thantlang khua an la thleng thei rih lova, Halkha leh Thantlang khaw inkar Timit phaiah CDF te nen an la inbeih reng thu hriat a ni bawk.
