Chin State, Halkha khawpuiah CNA Brigade 5 huam chhunga rawn puitu CNA Brigade 1 leh Military council sipaite April 30 khan an inkap a. He inbeihnaah hian Military council sipai 15 aia tlem lo an thi a, 10 chuang vel an hliam thu hriat a ni a.
He inbeihnaah hian Military council sipaite ralthuam, CNA battalion-ten an laksak nual thu hriat a ni bawk.
Heng bakah hian Halkha leh Gangaw khawpui inkar motor kawng, Halkha township huam chhung Vantlang leh Malsawm khaw chhehvela CNA, CDF tangrualte leh Military council sipaite an inbeih hnu May 5 tuk pawh khan Malsawm khua Military council sipaiten Thlawhnain an bomb nawn leh thu hriat a ni a.
“May 5 tuk khan Military council sipaiten Jet Fighter-in vawi 3,4 vel an bomb a. In chhia erawh a awm kan hre rih lo. May 3-a an bomb tum khan Biak in pakhat an bomb chhia” tiin tualchhung mi pakhat chuan a sawi.
May 2 khan Military council sipaiten Malsawm khua an bomb tum khan Biak in pakhat a chhe tawh a. Malsawm khua hi Halkha khawpui atanga mel 35 vela hla; In 50, mihring 250 vel chenna khua a ni a, April 30 khan a khawpumin an tlan chhuak vek a ni.
Gangaw township atanga Halkha township lam pan mek Military council sipai operation 77 Battalion-te, CNA, CDF tangrualten Vantlang khua leh Malsawm khaw inkarah an beih mek laiin Falam panna motor kawnga awm ChungCung khuaah pawh an inkah reng thu hriat a ni bawk.
