Chin State, Halkha khawpuiah February 27 atangin passport a siam theih thu hriat a ni.
Halkha khawpuia passport siamna office-ah ni khat hmain booking lawk a ngai dawn a, ni khatah passport siam mi 100 vel chauh an phal rih thu passport siamna office-a thuneitu pakhat chuan a sawi.
“Ni khat duhah Application an lei hlawm a, mi an tam avangin chawhnu dar 1:00-ah chuan an khat vek tawh bakah a tuk leh thlengin an khat vek tawh a. A naktip leh atan pawh an zuar leh tawh” tiin a sawi zui bawk.
Passport siam tur niah mi 400 an theh lut a, ni khatah mi 100 chauh an phal avangin mi dang chu an kir leh hlawm a ni tiin Halkha khuaa tualchhung mi pakhat chuan a sawi a ni.
Halkha khua passport office-ah bial mi nihna 4/ neitu te leh sagaing region, Kalaymyo township, Tamu township leh Gangaw townsip-a bial mi chhinchhiahna 5/ lakah an fihlim thu bakah a bial chhunga mi ten an siam theih thu passport office-a thuneitu pakhat chuan a sawi a ni.
Passport siam tur te hian tun hmaa Kyats 40000 an senah tun hnuah Kyats 50000 an senso thu hriat a ni.
Military council ten rampum huapa passport siam tur te January thla atangin an khar a, February 24 atangin siam an phal leh thu hriat a ni.
Myanmar ram chhungah Military council ten thuneihna an lak hnu hian hnathawktu leh sumdawng mi ten harsatna an tawk nasa hle a. Ram thenawma hnathawk leh zirnaa feh chhuak thalai rual te an tam tawh hle a ni.
