Chin State, Halkha khawpuiah passport siamna office-ah form la turin an inchuh nasat thu passport siamtu zinga mi pakhat chuan a sawi a ni.
Passport siam tur hian zing dat 4:00 atangin office-ah an thleng tan tawh a, zing dar 6:00 velah mi 200 an chuan tawh avangin passport siam a harsat thu passport siamtu pakhat chuan heti hian a sawi a ni.
“Form lak a harsa hle a, ni khat hun pek a ngai. Nilengin kan intlar a, vanneih chuan kan hmu mai a, form an sem a, chu pawh chu March 20 atangin 24 tan chauh a la ni” tiin a sawi a ni.
Passport tur form lak a harsat avangin office pawna zuar chawng an awm nual a, form pakhatah Kyats 30000 atangin Kyats 100000-a hral te pawh an awm thu hriat a ni.
Halkha khawpuiah tun hma lawk atangin passport siam an awm nual tawh a, tun hnuah commission te an tam tak avangin Kytas nuai 3 atangin Kyats 10 senso a ngaih tawh thu Halkha khua tualchhung mi pakhat chuan a sawi a ni.
Mahnia passport saim turin ID card (Naing Nga Ta Kat Pia) 4/ nei te tan Kyats nuai 50000 senso a tul a, 5/ nei te tan Kyats nuai 180000 sen a ngaih thu hriat a ni.
Hetia passport siman man a sanna chhan hi Chin State bakah Sagaing region, Kalaymyo, Tamu leh Magwe region Gangaw township-a mi ten an siam vang a ni tiin Halkha khuaa tualchhung mi pakhat chuan a sawi a ni.
Myanmar-ah Military council ten thuneihna an lak hnu hian ram chhungah hnathawh tur leh sum zawnna a harsat avangin ram pawna hnathawk tur leh zirna chhunzawm tur ni tin an pung chho zel a ni.
