Chin State, Halkha khawpui leh Thantlang khaw inkar Tlangrawn khuaa inbeihnaah CNA sipai 2, ram tan an nunna an hlan thu June 12 tuk khan an puan thu hriat a ni a.
June 12 zing dar 4 vel atang khan Tlanngrawn tlangah Military council sipaite leh CDF tangrual pawlte an inbeihnaah Military council sipaiten ralthuam lian an chelek chiam avangin CNA sipai 2, Salai San Oo leh Salai Thawng Nawl Hol te an boral thu The Zotung Post chuan a tar lang a.
“CNA-a thawk mek ZOTUNG thalai 2 te chu Chin State Halkha leh Thantlang khaw inkar Timit phaia inbeihnaah June 12 tuk khan an boral” tiin The Zotung Post chuan a tar lang a ni.
May 26 atang khan Halkha leh Thantlang khaw inkar Timit phaitual chhehvel leh Lungrawn khaw chhim lamah Military council sipai 150 rualten ni tin an beih thu hriat a ni a. Chumi karah Military council sipaiten Halkha khawpuiah ni tin ralthuam lianin an beih reng thu hriat a ni bawk.
Chawlhkar 3 chhung an inbeihnaah hian Military council sipai 50 chuang an thi tawh a, ralthuam tam tak CDF-ten an laksak nual thu CDF pawlte leh a hnaivai news-ten an tar lang bawk.
Halkha leh Thantlang khaw inkar Timit phaitual inbeihnaah hian CDF sipai 17-te ram tan an nunna an hlan thu hriat a ni bawk.
