Paletwa township, hun khaihlak chhunga zirna chungchangah harsatna chin fel a nih loh chuan kum 2023-24 zir kumah hmalak a harsat dawn thu Paletwa township Education Board ten an sawi.
Chin State, Paletwa township khaw 380 zingah Paletwa CDF-te thununna huam chhung (Paletwa-CDF Control Area) khaw 65-ah zalen taka raltlan camp hmun 9-ah Paletwa township Education board (PTEB) ten zirna an hawng mek a.
Ram dinhmun a that loh avangin naupangte zirna chungchangah kum 2022-23 zir kum, hun khaihlak chhung khan hma an la ve nasa hle a. Paletwa township-a zirtirtu Zaa 10 vel chauh CDM-a lut te leh tlawmngai miten an zirtirnaah harsatna an tawh thu PTEB pawl zinga mi pakhat chuan a sawi.
“Paletwa township-a CDM lut leh CDM zirtirtu kan indaih lo a, zirlai thar kan zir avangin harsatna kan tawk ve nual a. Township dang angin Training kan pe thei lova, Education-in sum kan nei bawk si loh avangin zirtirtuten harsatna an tawk mek a ni” tiin PTEB thuneituten an sawi a.
Heng bakah hian mipuite leh sumdawng miten tlawmngaia zirtirtute kan chhawmdawl theih tawh loh avangin zirlai naupangten zirlaibu leh an mamawh leina turah harsatna an tawh thu PTEB Board-a thuneitu pakhat chuan an sawi bawk a ni.
CDF-Paletwa huam chhuang Primary leh Middle School 65-ah hian zirlai 5000 chuang leh zirtirtu 200 chuang an awm thu hriat a ni.
Paletwa township-a naupangte hi Military council-ten thuneihna an lak hma atang khan Arakan Army(AA) leh Military council sipaite an inkah thin avangin zirna chungchangah leh Covid-19 hri leng bakah Military council ten thuneihna an lak hnu thleng hian zirna lamah harsat an tawk hle thu hriat a ni a.
Chuvangin kum 2023-2024 zir kumah hun khaihlak chhunga zirna an chhunzawm theih nan Paletwa mite ram chhung leh pawn bakah NGO hrang hrang ten theih tawp chhuaha tanpui theih turin Paletwa township, Education Board ten an ngen a ni.
