Myanmar ram hmar lam, Kachin mipuite punkhawmna hmun pakhat chu sipaiin air strike a neih avangin, mipui tam tamin nunna an chan thu hriat a nih hnuah US leh EU (European Union) pawlten he thil thlengah Military Council-in mawhphurna a la ngei tur a ni tiin Myanmar rama awm embassy leh hmun danga awm embassy ten thuchhuah intawm an siam a.
Hpakhan hmuna bomb thlakna chu international Humanitarian Law-in tarlan, civil mite venhimna pek tur tih mawhphurna palzutna chiang tak a nih thu thuchhuah chuan a tarlang a.
Thuneihna latu sipaiten chhuanlam tur pawh awm lova, mipui pawisawi lote an beihna avangin, ram pum puiah harsatna tawk an tam tawh a, chungte chu sipai thuneituten a mawh an phur tur a ni, tiin Embassy ho chuan thuchhuah an siam a ni.
Chu thuchhuah chu Australia, Canada, Myanmar to EU office leh European Union ram Czech, Denmark, Finland, France, Germany, Italy, Netherland, Spain leh Sweeden ram bakah, Norway, Switzerland, UK leh US rama Myanmar ram kaihhnawih Ambassador ten hming an ziak hnan a ni.
Chutianga US leh EU member ten thuchhuah khuah ang reng tak an chhuah laiin, Myanmar to UN office lam chuan Myanmar ram chu hlauhthawn awm dinhmuna a awm thu chhuahin, Military council hming pawh tarlang lovin, security force tec het dan lutuk avangin mawh an phur tur a ni, ti ringawtin a tarlang thung a ni.
Kachin State, Hpakan (Pha Kant) khawpuiah October 23 zan dar 8:40 khan KIO din champha kum 62-na lawmna hun Concert an buatsaihnaah Military Council sipai ten Jet Fighter-in an bomb thut a, Artist tiamin mipui mi 50 vel an boral thu Kachin News atanga hriat a ni.
“Hpakan khawpui Brigade 9 ten Concert an buatsaih a. Zan dar 9:00 velah Military Council sipai ten Jet Fighter-in an bomb thut a, Artist tiamin mipui 50 vel an boral nia hriat a ni a, a zat chiah hriat a la ni lo. Chung lam atangin an rawn Bomb thuta” tiin tualchhung mi pakhat chuan a sawi.
Military Council sipai ten an Bomb-naah hian Kachin zai thiam lar tak Aurali-a pawh a boral thu hriat a ni.
“KIO Officer-te pawh hliam an awm nual a, tute nge an nih kan la hre chiang thei lo” tiin KIO hnaivai News ten Khit Thit Media a hrilh.
He chhiatna chungchangah Khit Thit Media ten KIO thupuangtu Colonel Naw Bo an Phone-naah chhanna a awm rih lo.
