Firfiak military council sipaiten Politian te, Activist-te leh sipai thuneihna dodalna lama hruaitu an mante chu sipai indawpna hmun (interrogation center)-ah nasa taka nghaisain, politican hmeichhe thenkhat chu pawngsualin, mipat hmeichhiat lamah tihbawrhban tuma an khawsak dante chu chhui chhuah a ni a. Khit Thit media-in chutianga sipaite chet dan tenawm tak report a dawnte chu han tarlang ta ila.
Mandalay khua, kulh chhunga sipai indawpna hmun chu pawisak nei lo leh mihring ang pawha inen lova, indawpna hmun niin a lar hle a. Firfiak sipaite mi man poltical prisoner-te chu wire hruiin an vua a, chemte hmawr zuma vitin an nghaisa a. Political prisoner pakhat chuan, “Chaw min pe lo. Regional level indawpna hmunah min dawp hmasa a. Wire-in ka taksa pum min vua a. Silai fawngin ka hmaiah min vua a, an tiangte a linglet zawnga kein ka kut leh hmai, luah min vaw bawk a. Ka beng chu plyer-a chepin an pawt a. Ka malah chem te hmawr zum an vit a. Ka biangah sipai boot thla lang khawpin min vua a, chung hliam hrehawm lutuk avangin, thih dilin ka tawngtai hial a ni,” tiin a sawi.
Chubakah, Mandalay kulh chhunga indawpna hmunah chuan brick bang luta tauhtir, inhnek, inthumrawn, mutnaah thlasik khawvawh lai ber pawhin chanchinbu phek pakhat chiah phaha muttir, chaw lah golf ball tiat leka inpek te chu sipai thil tih dan a ni a. Yangon sipai indawpna hmuna mipa pakhat chu mipat hmeichhiatna lamah sipaiten an nawmnah takin an cheibawl bawk a.
Ani chuan, “Ka sazu min peksak vak a, ka hmai an tuam tlat avangin tuin nge min pek tih chu ka hmu thei lo. Saruak ngal ngatin min awmtir a. Fanu i neih chuan I fanu kan pawngsual dawn. Nupui I neih chuan I nupui kan pawngsual ang. I mawngkua pawh kan ti mai ang, tia min vau bakah hetianga saruaka i awm lai hi thla kan la ang a, online-ah kan thehdarh dawn tiin min vau bawk a ni” tiin a sawi.
Yangon sipai indawpna hmuna man tawkte chu kah hlum an awm nual tih hriat a ni bawk a. Yangon-a awm bawk pakhat chuan, “Kan kap hlum thei che u, kan duh duhin kan tithei che u, thupek kan dawng vek tawh tiin sipaiten min hrilh a, a changing zanah invuak thawm ring tak tak leh silai puak ri te pawh kan hri a. An thah ngei thin a nih a rinawm,” tiin a sawi.
Mandalay အိုးဘို jail-ah pawh political prisoner-ten engemaw ni pawimawh bik zahna lantirna, political dialogue neihna, national anthem sakna hun an neih thin te chu tihtawpsak vek a ni a. Jail chhungah tui thianghlim lo inpek, damlote inenkawl phalsak loh, ei in thianghlim lo, room khatah mi tam deuh hnawh luihtir, thil sual tite leh jail-a hnathawkten political prisoner-te beihrawna sawisak changte a thleng thin a.
Yangon Insein jail-ah pawh political prisoner-te chu jail-a hnathawk te, misual tangte leh thuneituten an rapbet tlat a, jail chhungah doctor thiam tak an awm loh avangin, a hun taka inenkawl hman loh avanga thi tate pawh an awm nual thu hriat a ni.
Jail-a hna thawk a tam zawk chu lehkha. Thiam lote an nih hlawm avangin, political prisoner-te chu an inhmehtir a, an pheikhawk an hnawhtir a, ni tin deuh thawin pawn lam atanga an chhunga rawn dah luh ei turte an lo eisak thin bawk a. Chutih rual chung hna thawkten political prisoner-te awmna ward an endik laiin, an chhungte thil pek chhang te, coffee mixed te chu zun bawmah dahsakin, an khumte pheikhawkin an rah balhsak thin bawk thih hriat a ni a.
Chubakah, Political prisoner-te chu bawlhhlawh bawm, ek bawm, chaw bel put, inthiarna tihfaitir an niha an thawh that loh chuan pawisa chawitir emaw thil dang tihtir emaw, a nih loh vek leh nitin neksawr an ni thin.
Jail chhunga political prisoner-te awm tamna hmun chu a thianghlim tawk lova, thak, pan, ringworm leh hri chi hrang hrang a inkaichhawng thin a, jail clinic lahin natna chi hrang hrang awm mah se, eng natna atan pawh damdawi chi khat chiah an pe chhuak thin a, pawisa pek thei deuhte chauh an mamawh inenkawlna tur damdawi an pe thin tih hriat a ni.
A nihna takah chuan jail chhunga clinic leh damdawi inah chuan jailer-te pawisaa tham lungawi theite chauh mahni inenkawlna tur mamawh nei theiin an awm a. Chung damdawi ina thawk doctor-te lah chu thiam tak an nih loh avangin a hun taka enkawl hman loh leh enkawl theih loh jail tang tam takin an thih phah tih pawh hriat a ni bawk a.
Military council chuan water festival chhungin political prisoner-te chu hmun hrang hrangah a sawn kual niin, pawl thenkhatin an sawi a. Chu pawh chu sipai lam dinhmun derthawn tawh vang leh an hlauhthawn vanga ti kual vel nia sawi a awm a. Myanmar ramah sipaiin thuneihna an lak hnuah an mahni dodaltu mi 13000 chuang chu jail hrang hrangah khungin an sawisa mek a ni.