Indian port construction company Adani Ports chuan Myanmar sipaite sumdawnna MEC nen thawkhoa an sak mek Yangon Container dahna tur port project, dollar maktaduai 290 man chu chawlhsan a tum thu leh Myanmar rama investment a neih zawng zawng pawh naktum 2022 March leh June thla inkarah tihtawp vek a, Myanmar chhuahsan a tum thu official-in a puang zar tawh a.
Adani Port company chuan America ramin Myanmar ram chu sumdawnna lama a hrek tak tak a nih chuan Myanmar ram chhunga Yangon Port project chu thawk chhunzawm lo a, investment an neih zawng zawng pawh lak chhuah leh vek an tum thu tun hma deuh atangin an lo puang tawh bawk a ni.
Adani Ports chuan, “Myanmar rama thil thlente keini company management committee lamin kan han bih chianin Myanmar rama investment neih zawng zawngte hnutchhiah a, chhuahsan mai kan tithlu ta a ni,” tiin thuchhuah an siam a.
Adani Ports hian bungraw dahna Port pakhat chu Myanmar sipai ramah sain, chu port (tuipui kam lawngchawlh theihna) chu ralthuam, puak thei lam thil lakluh nan emaw, Navy base camp pakhata hman theih tura ruahman a ni a. Ram pawn lama awm Human rights pawl thenkhat chuan chu port chu ruahmanna hlau tak a nih thu an tarlang a.
India rama Private Multi-Port Operator lian ber a ni a, tunah hian Myanmar Economic Cooperation (MEC) hnen atanga ram hawhin Alon International Port gate no. 2, US dollar maktaduai 290 man project thawk mekin, kum 2021-ah phase 1 zawh hman tum a ni a. Myanmar sipaiten Yangon khawpuiah tuipui lawngchawlhna (port) 4 an nei a, chung atang chuan an duh ang zawng thil chi hrang hrang ralthuam telin an tawlh lutin an tawlh chhuak a, sorkar thuneitu lam an inrawlh thei lo bawk a, an tan sum siamna leh lakluhna hnar tha tak a ni.
