India rama Myanmar mi te zawm tur dan chi 5, NUG sorkarten thuchhuah an siam thu hriat a ni a.
He thuchhuah hi NUG foreign Minister-in June 15 khan a chhuah thu hriat a ni a, a thu chhuahah hian India rama thuneih kawngah (sovereignty) leh ramri chungchang (Territorial integrity)-ah pawi khawihna laka inveng theuh turin an tar lang a.
Heng bakah hian Myanmar mi te awmna Veng, khua-ah ram chhung chetvelna (Political and administrative matters) thil reng rengah inrawlh lo turin leh a hnawksak zawnga awm lo turin NUG sorkar chuan a ngen bawk a ni.
Myanmar ram buaina avangin Myanmar mi tam tak India ramah an raltlan nasa hle a, a bik takin Zo hnahthlak tam zawk te chu Mizoramah an raltlan nasa hle a, tuna hriat theih chinah mi 30000 chuang an awm tawh thu hriat a ni bawk.
Heng bakah hian Manipur State-ah leh Delhi khawpuiah pawh Myanmar mi raltlan an sang tel an awm nual thu hriat a ni a.
Myanmar raltlante hian ruihtheihthil ti leh zawrh ruk te, ramsa tawlh ruk te leh Veng leh Khawchhung ti ralmuang lo zawnga ti lo turin leh an dan siam te zawm hram turin NUG sorkar chuan a ngen bawk a ni.
Harsatna an tawh chuan Myanmar lam hruaitute hnena in-report turin a ngen a. Khawvel Democracy ram lian India hian Myanmar nen an inpawh thuk hle thu hriat a ni a. Chuvangin India rama Myanmar miten awm dan kan thiam loh chuan harsatna lian tak kan tawng thei a ni tiin politician pakhat chuan a ngaih dan a sawi a ni.
