Indo – Myanmar ramri Moreh khawpuiah raltlan mi 5000 chuang awmna camp chu Manipur State sorkar chuan hawn a tum thu India base IFP news chuan a tarlang a ni.
State Minister huaihawtnain Chief Minister N Biren Singh chuan Sub committee a din a, committee member Minister 3 ten a hmunah tlawhin raltlan te nen an inkawm nasa hle a. Myanmar ram dinhmun a that hnuah thawn kir leh an ni ang tiin an pawl leader Letpao Haokip chuan Media mi te hnenah a hrilh a ni.
Heng Myanmar raltlan zingah hian Myanmar MP Thangsei Haokip pawh a tel a. Sagaing region-ah hian Myanmar Military council sipaite leh PDF te an inkah nasat avangin India lamah an tlan luh nual thu Manipur Minister te hnenah an sawi thu news chuan a tarlang a ni. Raltlante an chanchin kimchang chhinchhiahin Raltlan Card an siamsak dawn thu hriat a ni.
Dan leh hrai zawmtu leh raltlan card nei te chauhin camp-a awm phal a nih dawn thu Manipur Minister pawla an leader chuan a sawi a. Mamawh pawimawh zualpui ruahman sa vek a ni tawh a, a tul angin hmanraw dang pawh chhawmdawl an ni zel ang tiin Manipur khawpuia thunneitu pakhat chuan a sawi a ni. Tunah hian security tur te an dah nual tawh a, health office lam pawh hawnsak an nih dawn thu hriat a ni bawk.
