Military council sipaite buk khuarna Chin State, Khaikam khua police Station (Ku Myaing= Mel 9) leh Kalay University gate-pui mel khat vel chhehvela awm mipui 1000 chuang an tlanchhiat nual thu hriat a ni a.
Military council sipaite buk khuarna chhehvela awm mipuite May 10, zing dar 10;00 hmaa insawn chhuak lo te chu mawhphurhna kan la lo vang tia CDM-Siyin-ten May 9 khan thupek an chhuah avangin May 10 tuk atang khan an chhehvel hmun hrang hrangah an inthliar chhuah thu hriat a ni a.
“May 9 zan khan inthliar chhuak vek tura ti ni mah se, kan tlanchhuak dawn nge dawn lo kan inngaihtuah hlawm a. Petrol thun tura kawngpui ka chhuahin mipui inthliar chhuak tur ka hmuh nual avangin ka nu te nen hak lai chauh la chhuakin kan tlanchhuak ve nghal” tiin tlanchhuak zinga tualchhung mi pakhat chuan a sawi a.
He boruak chungchangah hian Tedim township, Khaikam khua, Kalaymyo leh Chin Hill ramri Ku Myaing, HlaingTharYa Ward-a tualchhung mipui 1000 chuang deuhthaw Kalaymyo leh a chhehvel an chhungte leh thiante hnenah an tlanchhe hlawm a, mi thenkhat chhungkhat laina nei lo te chu an la chambang rih thu hriat a ni bawk.
Hetia mipuite an tlanchhiat lai hian Military council sipaiten In chhuahsana tlanchhia in awm chuan in chenna in ka hal chhia ang tiin a vau thu hriat a ni bawk a.
Tunlai tak hian Ku Myaing leh a chhehvelah inkah buaina awm lo mah se, Military council sipaiten zan tin ralthuam lian leh te an kah chhuah fo thu tualchhung mite hnen atanga hriat a ni a.
Tun dinhmunah hian Industry Zone leh Ku Myaing chhehvelah mipui veivak an awm meuh lova a reh thiap thu tualchhung mi pakhat chuan hetiang hian a sawi a.
“Pawimawh avangin ka haw zawk a, Tahan atangin Industry Zone inkar chu mi veivak an pangngai a, Industry Zone leh Ku Myaing inkar chu reh tak a ni” tiin tlanchhe zinga mi pakhat chuan a sawi a ni.
Military council sipaite Chin Hill, Sagiang ramri Ku Myaing (Kalay University gate-pui) leh Chin State, Tedim township Khaikam police Station-a buk khuar te hian check gate-ah security uluk taka an duty avangin Kalaymyo atanga Tedim-Rikhawdar khaw pan tur motor service te tlan tlang an phal loh thu hriat a ni bawk.
