Military council-ten thuneihna an lak avanga inkah buaina avangin Kayin State-a mipui Nuai 6-in in leh lo an tlansan thu KHRG-ten an sawi a.
Kumin chhungin KNU huam chhung Brigade 7-ah KNLA tangrual pawl leh Military council sipaite vawi tam tak an inkah avangin tualchhung mi 600000 (Nuai 6) velin in leh lo an tlansan thu an sawi a.
April thla tir khan KNU Brigade 3 leh 4, huam chhunga mipuite an tlanchhe nawn leh a, ei leh in, damdawi leh in chung khuhna an mamawh zual thu an sawi bawk a.
Thai-Myanmar ramri, Myawadi (Miah Wa Di) leh WeiLay (We Li) khuaah relief camp 7 a awm a, Lay Key Kaw khaw thar, Palaw TaPu raltlan camp-ah raltlan 30000 chuang awmten an ralmuan loh thu Lay Key Kaw khawlal zinga thuneitu pakhat Saw PaTa Yar chuan hetiang a sawi a.
“Tuna an awmna hi eng tin zawng pawhin an ral a muang thei ngang lo. An chhehvelah hian Thlawhna thlawk ri leh inkap thawm an hre reng a, an rilru a nuam thei lo” tiin a sawi a.
Tun dinhmunah hian Thai leh Myanmar ramri Thuong Yin tuipui kamah raltlan camp 7-ah raltlan 20000 chuang an awm bawk a, ei leh in, damdawi, in chung khuhna leh tui thianghlim bakah pawimawh dang an mamawh nual thu Saw PaTa Yar chuan a sawi a.
Heng raltlan mangang te hi Kayin mipui tlawmngai pawl hrang hrangten kan la chhawmdawm mek tiin KHRG-a thuneitu Saw Nandar Su chuan a sawi a. Myawadi, KawKaReih, Kyan Inn Seih Gyi, Pha Pon, Tan Taung khua velah KNLA leh Military council sipaite chung lam leh tui lam atangin ni tin an la inbei reng a, Ye khawpuia innghat Military council sipai, Khah Mah Yah (IB) 558, IB 106-ten ralthuam lian leh tein an kah reng thu KNLA-a thuneitu pakhat chuan a sawi a ni.
